«Հայկական կողմի դիրքերը չեն հավասարեցվում Ադրբեջանի հետ: Նկատենք, որ հայտարարության մեջ ազատագրված տարածքները «օկուպացված» չեն համարվում, ինչը շատ դրական է մեզ համար: Չեմ կարող ասել, որ սա ՀՀ իշխանությունների աշխատանքի արդյունքն է: Սա Ադրբեջանի իշխանությունների անհեթեթ աշխատանքի հետեւանքն է»,-խորհրդարանում այսօր Aravot.am-ի եւ Tert.am-ի հետ զրույցում անդրադառնալով ԵԱՀԿ Մինսկի խմբի՝ տարածաշրջանային այցն ամփոփող հայտարարությանը, ասաց «ԵԼՔ» դաշինքի պատգամավոր, «Հանրապետություն» կուսակցության ղեկավար Արամ Սարգսյանը:
Aravot.am-ի հարցին ի պատասխան, թե որո՞նք են Ադրբեջանի համար սահմանին տեղային սրացումների դիմելու պատճառներն ու գործոնները, Արամ Սարգսյանը նշեց. «Տնտեսական իրավիճակից մինչեւ կլանային սրացումներ…հավատացեք՝ ինչպես ՀՀԿ-ին ու Սերժ Սարգսյանին է դժվար այստեղ իշխանություն պահել տասը հազար դրամներով, այնպես էլ բռնապետական Ադրբեջանի նախագահ Ալիեւի համար է դժվար եւ անհամեմատ ավելի դժվար…Այնտեղ ոչ միայն այդ 10 հազար դրամը չեն տալիս, այլեւ ուզողին կալանավորում են: Սա թող ՀՀԿ-ն ձեռքբերում չհամարի եւ իրեն չհամեմատի Ադրբեջանի հետ, բայց այնտեղ այդ վիճակն է՝ անգամ բանկեր են փակվում…»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
