Էրեբունի եւ Նուբարաշեն վարչական շրջանների ընդհանուր իրավասության դատարանում այսօր հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված ու ծանր հանցագործությունների մեջ մեղադրվող «Սասնա ծռեր» զինված խմբին օժանդակելու եւ նրանց միանալու փորձի մեջ մեղադրվող Անդրիաս Ղուկասյանի գործով հերթական դատական նիստն է: Վկաները չէին ներկայացել, ուստի պաշտպանական կողմն անցավ միջնորդություններ ներկայացնելուն:
Անդրիաս Ղուկասյանը նախ միջնորդեց որպես վկա հարցաքննել լրագրող Լեւոն Բարսեղյանին եւ երաժիշտ Եղիշե Պետրոսյանին, որոնք դեպքի օրն իր հետ եղել են Ազատության հրապարակում, նաեւ՝ տեսագրություն հետազոտել որպես ապացույց:
Ղուկասյանն ընդգծեց՝ ոմն Արտակ Մկրտչյանն իր դեմ ցուցմունք է տվել առ այն, որ Անդրիաս Ղուկասյանն Ազատության հրապարակում՝ մինչեւ դեպի Սարի թաղ երթով շարժվելը, առանց բարձրախոսի քաղաքացիներին կոչ է արել քարեր վերցնել՝ ոստիկաններին վնաս հասցնելու նպատակով:
Անդրիաս Ղուկասյանը նշեց. «Նա նախկինում դատված է եղել գողության համար, հաշվառված է Գորիսի բժշկական կենտրոնում՝ հոգեկան առողջության խնդիրներով: Հետո նա խոստովանեց, որ իր եղբայրը ռազմական ոստիկանության փոխգնդապետ է: Միջնորդեցինք, որպեսզի Արտակ Մկրտչյանի մասնակցությամբ քննչական փորձարարություն կատարվի, սակայն քննիչը միջնորդությունը մերժեց: Ի հակառակ Արտակ Մկրտչյանի պնդումների՝ կա լրատվամիջոցի տեսագրություն այն մասին, թե ինչպես եմ ես իջնում Ազատության հրապարակի հարթակից եւ մի շարք հասարակական-քաղաքական գործիչների հետ շարժվում դեպի Թումանյան փողոց: Դա որպես ապացույց ճանաչելու միջնորդությունս եւս մերժվեց քննիչի կողմից: Քննիչի գործողությունների դեմ բողոք ներկայացրինք դատախազ Պետրոս Պետրոսյանին, որը եւս մերժվեց: Միջնորդում եմ որպես ապացույց հետազոտել նշյալ տեսագրությունը եւ որպես վկա հարցաքննել Լեւոն Բարսեղյանին եւ Եղիշե Պետրոսյանին»:
Դատախազ Պետրոս Պետրոսյանը միջնորդության դեմ առարկեց՝ ասելով, որ նախաքննության ժամանակ Լեւոն Բարսեղյանը հարցաքննվել է, իսկ Եղիշե Պետրոսյանը եղել է կասկածյալի կարգավիճակում եւ հրաժարվել վկայություն տալուց:
Դատավոր Վարդան Գրիգորյանը որոշեց բավարարել միայն Լեւոն Բարսեղյանին եւ Եղիշե Պետրոսյանին որպես վկա հարցաքննելու միջնորդությունը, իսկ տեսագրությունը որպես ապացույց ճանաչելու միջնորդությունը, ըստ դատարանի, ժամանակին չի արված:
Լուիզա ՍՈՒՔԻԱՍՅԱՆ
