«Ամերիկայի Ձայն». Անցած տարի հրապարակված հայ եկեղեցու պարգևների մասին գիրքը օրերս հասանելի դարձավ ամերիկյան և ամերիկահայ ընթերցողին: Վաշինգտոնի Հայաստանի դեսպանությունում տեղի ունեցավ եկեղեցական և պետական պարգևների մասնագետ Նիկա Բաբայանի «Հայ եկեղեցու պարգևներ» գրքի շնորհանդեսը:
Հեղինակի խոսքերով այս աշխատանքի պատրաստմանը նրան ոգեշնչել էր 2015 թվականի ապրիլի 12-ի Հռոմի Պապի կողմից Վատիկանում անցկացված հոգևոր արարողությունը:
Հայերեն, ռուսերեն և անգլերեն լեզուներով հրապարակված այս գրքում Բաբայանը ներկայացրել է ավելի քան երեք հարյուր լուսանկարներ, որտեղ պատկերված են տարբեր շրջանների պարգևներ, հուշամեդալներ, կաթողիկոսակամն կոնդակներ ու այլ բացառիկ նյութեր:
«Ես փորձեցի պարգևների միջոցով ներկայացնել հայ եկեղեցու պատմությունը»,- նշում է Բաբայանը:
Նա մատնանշում է, որ հայ եկեղեցու կողմից պարգևների տրամադրումը սկիզբ է առել դեռևս Հայաստանի առաջին հանրապետության օրերին, Հայոց կաթողիկոս Գևորգ 5-ի կողմից «Սբ. Գրիգոր Լուսավորիչ» շքանշանի թողարկմամբ: Հեղինակը ընդգծում է պարգևների տրամադրման հարցում հայոց եկեղեցու ու պետության կապը: Որպես օրինակ նա մատնանշում է կողմից «Սբ. Գրիգոր Լուսավորիչ» եկեղեցական շքանշանի վրա պատկերված հայկական եռագույն դրոշը:
Միջոցառմանը ներկա ամերիկահայ համայնքի ներկայացուցիչներն ու հոգևորականները ևս ընդգծեցին Բաբայանի գրքի կարևորությունը հայ առաքելական եկեղեցու պատմության ուսումնասիրության հարցում:
Հեղինակի պնդմամբ հայ առաքելական եկեղեցին առաջիններից էր, որ սկսեց պարգևներ ընծայելու ավանդույթը՝ սկսած 1918 թվականից: Ըստ նրա՝ Վրաստանի եկեղեցին սկսել է շնորհել դրանք 1963 թվականից, իսկ ռուսական եկեղեցին՝ 1950-ականների վերջից:
Աշխատության զգալի մասը նվիրված է հայ առաքելական եկեղեցու պարգևների պատմությանը: Հեղինակն անդրադարձել է նաև հայ կաթոլիկների ու բողոքականների պարգևներին: Բացի այդ, միջոցառման ընթացքում Բաբայանը խոսեց նաև խորհրդային շրջանի հայկական պարգևների մասին, որոնք ներկայացված են հեղինակի առանձին աշխատությունում:
Արամ Ավետիսյան
