www.e-hotline.am-ը ստեղծվել է քաղաքացիների բարձրացրած խնդիրներին, բողոքներին ավելի օպերատիվ արձագանքելու համար
Արդարադատության նախարարությունն այսօր ներկայացրեց արդարադատության ոլորտում Եվրամիության աջակցությամբ ներդրված նոր էլեկտրոնային երկու կայք։ Արդեն գործարկվել է թեժ գծի նոր կայքը՝ www.e-hotline.am-ը, այն ստեղծվել է քաղաքացիների, կազմակերպությունների և այլ շահագրգիռ անձանց կողմից բարձրացված խնդիրներին, բողոքներին և հարցումներին ավելի օպերատիվ արձագանքելու համար:
«Հենց այս գործիքներն են, որ հնարավորություն են տալիս այսօր լայն շրջանակների ընդգրկել պետական կառավարման համակարգում»,-ասաց Արդարադատության նախարար Դավիթ Հարությունյանը։
«Համոզված եմ, որ Հայաստանի թվայնացման գործընթացը և Եվրամիության աջակցությունը կբերի լավ արդյունքների»,- ծրագրի մասին ասաց Եվրոպական միության (ԵՄ) պատվիրակության ղեկավար, դեսպան Պյոտր Սվիտալսկին:
Էլեկտրոնային հաջորդ կայքը՝ www.e-request.am, հնարավորություն է ընձեռում առցանց եղանակով ուղարկել դիմում, հարցում կամ բողոք տեղեկատվություն տիրապետող պետական մարմիններին, ստանալ պատասխան ևս՝ առցանց եղանակով, միաժամանակ ներկայացնել կարծիք պետական մարմնի կողմից տրամադրված պատասխանի բովանդակության և տրամադրման ժամանակի վերաբերյալ, որի հիման վրա կազմվում է վիճակագրություն։
Արփինե ՍԻՄՈՆՅԱՆ
