Այսօր Գյումրի այցելած Կրթության և գիտության նախարարի պաշտոնակատար Արայիկ Հարությունյանն ասաց, որ տնօրենների մրցույթների ժամանակ ականատես են լինում, այսպես ասած, «թայֆաների» պայքարի։
«Երբեմն տնօրենների մրցույթների ժամանակ մենք բախվում ենք մի խնդրի, երբ որ գործող թայֆական մտածելակերպ ունեցող տնօրենին փորձում են փոխարինել մեկ այլ «թայֆայի» ներկայացուցչով, և երբեմն աղմուկը այդ պատճառով է շատ բարձրանում։ Նման երևույթներ կան՝ հին նեղացվածություններ, նախկինում հին խումբը մերժվել է, հիմա ուզում է ռևանշ վերցնել»,- ասաց նախարարը։
Արայիկ Հարությունյանը, պատասխանելով այն հարցին, թե կհաջողվի՞ զերծ պահել դպրոցները քաղաքական գործընթացներից, նշեց, թե Երևանում ու մյուս վայրերում դպրոցների քաղաքականացումը հասցված է զրոյի։ Երևանում ու մյուս քաղաքներում տեղի ունեցած ընտրություններն, ըստ նախարարի, ցույց են տվել, որ քարոզչություն դպրոցներում, աշակերտների ու ծնողների շրջանակում չի եղել, ցուցակագրումներ նույնպես չեն եղել։
Արայիկ Հարությունյանը նաև նշեց՝ իրեն հատնի չեն դեպքեր, որ դպրոցի տնօրենները դարձել են ՔՊ անդամ, իսկ այն տնօրենները, որոնք Հանրապետական կուսակցության անդամ են, նրանց ժամանակին հարկադրել են գնալ ու անդամակցել այն ժամանակվա իշխող կուսակցությանը։
«Ես վստահ եմ, որ նրանց մեծ մասը՝, 99,9 տոկոսը համերաշխ է նոր Հայաստանի կրթական համակարգի ղեկավարների առաջ բերած ծրագրերին և հեղափոխության գաղափարախոսությանը։ Չեմ կարծում, որ որևէ լուրջ խնդիր այս առումով լինի, վստահ եմ, որ այս տնօրենները կաշխատեն օրենքի և իրավունքի դաշտում։ Բոլոր այն տնօրենները, որոնք կխախտեն օրենքը, մեր ունեցած լիազորությունների շրջանակում միջոցներ կձեռնարկենք»։
Նունե ԱՐԵՎՇԱՏՅԱՆ
Նկատի ունենալով որ ամբողջ ուսումնական մակարդակը խոշո՜ր զեռօ մըն է, ի՞նչ կարեւոր՝ թէ ով են կարծեցեալ «դպրոց»ների տնօրէնները:
Ի դէպ, սա էական պատճառներէն մէկն է որ դասական Սփիւռքի հայերը, որոնք դպրոցական զաւակներ ունին, չեն ուզեր Հայաստան տեղափոխուիլ: