Հայաստանն աշխարհի ամենառազմականացված երկրների շարքում երրորդն է, իսկ Եվրոպայում ամենառազմականացված երկիրն է: Այս մասին ասվում է Բոննի կոնվերսիայի միջազգային ինստիտուտի «Համաշխարհային միլիտարիզացման ինդեքս 2018» զեկույցում:
Աշխարհի ամենառազմականացված երկիրը Իսրայելն է, երկրորդ տեղում Սինգապուրն է: Հայաստանին հաջորդում են Կիպրոսը, Հարավային Կորեան, Ռուսաստանը, Հունաստանը, Հորդանանը, Բրունեյը և Բելառուսը: Ադրբեջանը տասնյակից դուրս է մնացել և զբաղեցնում է 12-րդ հորիզոնականը: Նախորդ տարվա համեմատությամբ Ադրբեջանը զիջել է դիրքերը 4 հորիզոնականով:
Զեկույցում նշվում է, որ Հայաստանի ռազմական ծախսերը կազմում են ՀՆԱ 6.4 տոկոսը, իսկ 1000 հոգուն բաժին ընկնող զինվորականների թիվը 6.1 է:
«Չնայած 2006թ. ապրիլի արյունալի սրացումից հետո սկսված հրադադարի բանակցություններին՝ վերջին տարիներին Լեռնային Ղարաբաղի Կովկասյան տարածաշրջանում տեղի են ունեցել փոխհրաձգության դեպքեր, ինչպես նաև ադրբեջանական անօդաչուի կողմից մեկ հարձակում: Այս տարածաշրջանում շարունակվող լարվածության արդյունքում Հայաստանը և Ադրբեջանը շարունակում են հսկայական չափերի ռեսուրսներ ներդնել իրենց զինված ուժերում»,- ասվում է զեկույցում:
Պատրաստեց՝ Վիկտորյա ԱՆԴՐԵԱՍՅԱՆԸ
