ՀՀ վարչապետի պաշտոնակատար Նիկոլ Փաշինյանը ԿԳ նախարարի պաշտոնակատար Արայիկ Հարությունյանի հետ այցելել է Չարենցավանի թիվ 3 դպրոց, որտեղ շարունակվում է դասադուլը:
«2005-ից եմ աշխատում, դպրոցը վերցրել եմ քանդված վիճակում, որը հետագայում կապիտալ վերանորոգվել է»,-ասաց տնօրենի պաշտոնակատար Լուսինե Կարապետյանը: Նա շեշտեց, որ իր պաշտոնավարման շրջանում վերացրել են դրամահավաքները. «Այստեղ սեպտեմբերի 1 չկա, մարտի 8 չկա, քննություններին աշակերտները գալիս են մեկ գրիչով, ընդունել ենք նոր աշխատողներ: Վերջին անգամ 2013-ին եմ վերընտրվել»:
Լուսինե Կարապետյանն ասաց նաեւ, որ ի տարբերություն քաղաքի այլ դպրոցների, իրենց մոտ աշակերտների թիվը չի պակասել: Նրա ասելով, իրենց աշակերտները վարվելակերպում էլ տարբերվում են այլ դպրոցների աշակերտներից:
«Այսինքն, ուզում եք ասել քաղաքում մի լավ տնօրեն կա, մյուսները վա՞տն են»,-զարմացավ Նիկոլ Փաշինյանը:
«Չէ, մյուսները վատը չեն…Բայց մեր դպրոցում սովորում են սոցիալապես ամենաանապահով ընտանիքների աշակերտները»,- «պաշտպանվեց» տնօրենի պաշտոնակատարը:
Ապա հավելեց. «Խնդիրն այն է, որ ընտրությունների ժամանակ տնօրենի պայմանագրի ժամկետը լրացել էր, հայտարարվել է մրցույթ…Մրցույթի հետ կապված առերես ես բան չունեմ ասելու, այստեղ խնդիրը խորհրդի անդամների հետ է կապված»: Նա ասաց, որ մարզպետի նշանակած թեկնածուների հետ է խնդիրը, նրանցից մեկը դպրոցի նախկին աշակերտ է, որը Չարենցավանի թիվ 3 դպրոցում չի կարողացել ավարտել իր ցանկացած գնահատականներով եւ այլ դպրոցում է «լավ ատեստատ» ձեռք բերել:
Տնօրենի պաշտոնակատարը հայտարարեց, որ խորհրդի այդ անդամը նախատրամադրված է եղել. «Ինքն այդ տրամադրվածությունը, որ ուներ իմ հանդեպ, պահել էր, մյուս թեկնածուն էլ մարզպետարանի կողմից նշանակված այդ աշակերտի ընկերոջ կինն էր»:
Ի դեպ, դպրոցի խորհրդի հետ Փաշինյանի քննարկումն ուղեկցվում էր աղմուկով, եւ ԿԳ նախարարի պաշտոնակատար Արայիկ Հարությունյանն էլ հիշեց. «Հենց այսպիսի քննարկում էլ նախարարությունում էր»:
Գոհար ՀԱԿՈԲՅԱՆ
