Ինչպես տեղեկացրել ենք, այսօր փաստաբանների պալատում քննարկում էր կազմակերպվել Հարկային նոր օրենսդրության հետ կապված, որը շրջանառության մեջ է դրել ֆիննախը: Նախագծի համաձայն` փաստաբանները ընդհանուր հարկման ռեժիմ են տեղափոխվելու, 5 տոկոս շրջանառության հարկի փոխարեն 20% ԱԱՀ են վճարելու:
Փաստաբան Արամ Օրբելյանի գնահատմամբ՝ եթե սա դառնա օրենք, անհատ ձեռնարկատեր փաստաբանների վրա հարկային բեռն ավելանալու է բավականին շեշտակի՝ նույնիսկ 6-7 անգամ: Իսկ դա բերելու է ծառայությունների գնի նույնքան ավելացմանը. «Կորպորատիվ, հարուստ վստահորդների համար որեւէ խնդիր չի առաջացնում գների ավելացումը, գնի բարձրացում առաջանում է քրեական իրավունքում, ամուսնաընտանեկան ոլորտում, ժառանգության գույքի հետ կապված վեճերում, որտեղ հիմնականում դիմորդները ֆիզիկական անձինք են: Կառավարությունն աշխատում է այն տրամաբանությամբ, որ արտոնությունները պետք է վերացնեն, շրջհարկը, ըստ նրանց, արտոնություն է, ու քիչ-քիչ պետք է բերեն գերմանական մոդելի, որտեղ բոլորը ԱԱՀ վճարողներ են, ուրիշ բան չկա»:
Արամ Օրբելյանն ասաց, որ Մարդու իրավունքների պաշտպանի հետ քննարկում են ունեցել այս թեմայով, ու առաջարկեց դիմել ՍԴ ու ԱԱՀ-ն հակասահմանադրական ճանաչել, քանի որ այն բերում է մարդու իրավունքների սահմանափակման:
Փաստաբան Լուսինե Մկրտչյանն առաջարկեց, որ ֆիննախի ներկայացուցիչներին հրավիրեն Փաստաբանների պալատի վարչական շենք՝ իրենց դժգոհությունները լսելու, իսկ թե ինչու հենց այդ վարչական շենք՝ նրա բացատրելով՝ պարսից Շապուհ Երկրորդի պես կփորձեն «իրենց հողի» վրա հարցերը լուծել: Դա յուրորօրինակ ձեւ է՝ նրանց ճնշելու, ըստ փաստաբանի: Փաստաբանների պալատի նախագահ Արա Զոհրաբյանն էլ կատակեց՝ բա որ իրենց հողը հետները բերեն:
Փաստաբաններն ի վերջո որոշեցին հստակ քայլերի դիմել՝ նախագծի ճանապարհը փակելու համար: Արա Զոհրաբյանի խոսքով՝ «Եթե նախագիծը հասավ կառավարություն, եթե այդքան համառ կգտնվեն մեր հակառակորդները, ապա այդ օրը կառավարության մոտ բողոքի ակցիա ենք անցկացնելու: Փորձը ցույց է տալիս, որ դա ավելի արդյունավետ միջոց է, քան նամակներ գրելը: Կառավարության կողմից այդ նախագիծը հաստատվելու դեպքում բողոքի ակցիա ենք անելու 3 օր՝ հրաժարվելով ծառայություններ մատուցել: Եթե ԱԺ հասավ՝ 7 օր բողոքի ակցիա: Երկրորդ ընթերցմամբ ընդունելուց հետո անժամկետ բողոքի ակցիա»:
Արա Զոհրաբյանն ասաց, որ հուսով է՝ չեն հասնի վերջին կետին:
Որոշեցին նաեւ դիմել օմբուդսմենին:
Հռիփսիմե ՋԵԲԵՋՅԱՆ
