ՀՀ գլխավոր դատախազությունում պաշտոնական տեղեկություն չկա բնապահպանության նախկին նախարար, ՀՀԿ-ական նախկին պատգամավոր Արամ Հարությունյանի` հանրապետությունից բացակայելու մասին: Այդ մասին այսօր խորհրդարանում լրագրողների հետ զրույցում ասաց ՀՀ գլխավոր դատախազ Արթուր Հարությունյանը: Գլխավոր դատախազն ասաց, որ Արամ Հարությունյանի գտնվելու վայրի մասին առհասարակ տեղեկություններ չկան:
Վերջինս, հիշեցնենք, մեղադրվում է առանձնապես խոշոր չափի կաշառք վերցնելու եւ փողերի լվացման մեջ: Դեռեւս 2018թ. ԱԺ ընտրությունների նախընտրական քարոզարշավի ժամանակ «Իմ քայլը» դաշինքի առաջնորդ Նիկոլ Փաշինյանը հայտարարել էր, որ այդ պաշտոնյայի հետ կապված կոռուպցիոն սկանդալը կաշառքի ամենախոշոր դեպքն է նորանկախ ՀՀ-ի պատմության մեջ, եւ այն իր հետեւից դեռ շատ պաշտոնյաների է տանելու: Արամ Հարությունյանի դեմ ցուցմունք է տվել գործարար Սիլվա Համբարձումյանը: Արամ Հարությունյանը 2007 թվականից եղել է բնապահպանության նախարար: Նա մեղադրվում է հանքերի շահագործման լիցենզիայի տրամադրման դիմաց գործարար Սիլվա Համբարձումյանից առանձնապես խոշոր չափի` 14 միլիոն դոլար կաշառք ստանալու և փողերի լվացման համար։ Արամ Հարությունյանն այժմ հետախուզման մեջ է: Այս գործի վարույթը տարիներ առաջ կասեցվել էր եւ վերաբացվել 2018թ.-ին՝ նոր երեւան եկած հանգամանքի հիմքով:
Հարցին`տեղեկություններ կան, որ Արամ Հարությունյանը դիվանագիտական համարներով է լքել երկրի տարածքը, Արթուր Դավթյանը պատասխանեց` նման տեղեկություն չունեն։ Արամ Հարությունյանի պաշտպանն, ի դեպ, պնդում է, որ իր պաշտպանյալը ՀՀ-ում է:
Պաշտպանության նախկին նախարար Միքայել Հարությունյանի վերաբերյալ էլ դատախազությունում տեղեկություններ չունեն: «Պաշտոնապես կա տեղեկություն, որ նա լքել է ներպետական սահմանը»,- ասաց Արթուր Դավթյանը: Միքայել Հարությունյանին մեղադրանք է առաջադրվել 2008-ի մարտի 1-ի գործով: Ինչպես հետագայում պարզվեց, ՀՀ պաշտպանության նախկին նախարարը ՌԴ քաղաքացի է:
Կարդացեք նաև
Նելլի ԳՐԻԳՈՐՅԱՆ
