Վարչապետ Նիկոլ Փաշինյանը կառավարության տարբեր անդամների հետ այսօր Գյումրիում է. նա եկել է մասնակցելու «Իմ քայլը հանուն Շիրակի» բիզնես համաժողովին, որը կազմակերպվել է Գյումրու տեխնոլոգիական կենտրոնում: Նախքան վարչապետի այցը գյումրեցի մի քանի բողոքավոր կանայք վիճաբանության մեջ մտան ոստիկանների հետ` պնդելով, որ իրենք պարտադիր պիտի տեսնեն պարոն Փաշինյանին:
Նրանցից մեկը նույնիսկ պառկեց գետնին` ենթադրության տեղիք տալով, որ ուշաթափվել է: Վարչապետի` տեխնոպարկի տարածք ոտք դնելուն պես կանայք սկսեցին անբնական գոռալ, որոնց ձայնից Նիկոլ Փաշինյանն ակամա կանգնեց:
Կանանցից մեկն ասում էր, որ երկու ամիս է` նամակ է գրել վարչապետին, սակայն իրեն հուզող խնդրին պատասխան չի տրվել: Նրանցից մեկն էլ խոսում էր սոցիալական վիճակից, սոված օրեր անցկացնելուց: Կանանցից երկուսը Գյումրու Գարեգին Նժդեհ փողոցի փլուզված հանրակացարանի բնակիչներ են, որոնք, չնայած շենքի խիստ վտանգավոր լինելուն, շարունակում են ապրել այնտեղ:
Կարդացեք նաև
Վարչապետը լսեց նրանց ու շարժվեց դեպի տաղավարներ, որտեղ գյումրեցի տարբեր գործարարներ ցուցադրության են հանել իրենց արտադրանքը: Վարչապետին գրեթե ամեն տաղավարում նվեր էին տալիս, հյուրասիրության անում: Նա դեռ շրջում է տաղավարում, քիչ հետո կսկսվի համաժողովը:
Նունե ԱՐԵՎՇԱՏՅԱՆ
