2-րդ կարգի հաշմանդամ Աշոտ Մնացականյանն իր մարտական մկրտությունը ստացել է Ֆիզուլիում, ապա Հադրութում, Գորիսում: Նա «Առավոտ» էր եկել իր նամակով, որը խնդրեց ամբողջությամբ տպագրել: Նա իր «դիմում-պահանջը Փաշինյանին» ուղարկել էր նաեւ ՀՀ կառավարություն, սակայն այնտեղից հարկ չեն համարել պատասխանել: Տպագրում ենք նամակն ամբողջությամբ:
«Կցանկանայի դիմումս սկսել «հարգելի» կամ «խնդրում եմ» բառերով, սակայն քո կարգավիճակն ու իմ իրավիճակը թույլ չի տալիս այդ անել, քանի որ հարգանքը պետք է լինի փոխադարձ, իսկ խնդրանքը՝ տեղին:
Ես այն ազատամարտիկներից մեկն եմ, ով իր արյան գնով ապահովել է քեզ եւ բոլոր պաշտոնյաներին շքեղ աշխատասենյակներով, թանկարժեք մեքենաներով եւ շատ բարձր աշխատավարձով: Բարեկեցիկ եւ կենսուրախ կյանքով:
Այսօր ես սայլակավոր հաշմանդամ եմ, եւ դու տալիս ես մեկ սայլակ եւ ընդամենը 25 000 դրամ թոշակ: Բնակվում եմ միայնակ, հոսանքազրկված, գազազրկված, շուտով նաեւ ջրազրկված բնակարանում՝ պարտքերիս պատճառով: Իմ խնդրանքին՝ ցուցաբերել որեւէ աջակցություն, Կոտայքի մարզի թոշակառուների բաժնի պետը պատասխանեց՝ չկա, իսկ հարցիս, թե ո՞վ պետք է կատարի օրենքով հաստատված բոլոր պարտականությունները, պատասխանեց. «Ես իմ կաբինետում նստած ի՞նչ իմանամ»:
Կարդացեք նաև
Ճիշտ է ասում, որտեղից լինի, երբ հազիվ է հերիքում հոգալ պաշտոնյաների շքեղ կարիքները: Ունեմ փաստեր բյուջեից անհիմն դուրս գրված ահռելի գումարների մասին: Կներկայացնեմ անպայման հանդիպման ժամանակ: Իսկ ձեր բոլոր հանձնարարականների վրա մեր համայնքի ղեկավարը թքած ունի եւ չի կատարում: Չնայած դրան՝ նա շարունակում է պաշտոնավարել, որովհետեւ ունի աջակիցներ ավելի բարձր պաշտոններով:
Մյուս աջակիցը Մարության Հայկն է, որն այս ճգնաժամային պայմաններում բյուջեից դուրս է գրել կրկնակի պարգեւավճար: Եվ սա այն դեպքում, երբ որդեկորույս մայրերը դուրս են գալիս ցույցի, որպեսզի կառավարությունն աջակցություն ցուցաբերի իրենց կենսակերպն ապահովելու համար: Մայրեր, ում զավակներն իրենց կյանքն են տվել մեզ համար: Ես խոնարհվում եմ նրանց առաջ… Այսպես ապրելն անհնար է: Ըստ այնմ, պահանջում եմ ինձ տալ փաստաթուղթ, որտեղ գրված է, որ ՀՀ կառավարությունը հրաժարվում է իր պարտավորություններից: Փաստաթուղթը ներկայացնելու եմ այլ երկրների դեսպանատներին` սոցիալական ապաստան ստանալու համար:
Փաստաթուղթը կտաս դու, Փաշինյան, դուխով, չվախենաս»:
Աշոտ ՄՆԱՑԱԿԱՆՅԱՆ
Կոտայքի մարզ, գյուղ Արզնի, 1-ին փողոց, 1-ին փակուղի, տուն 7
«Առավոտ» օրաթերթ
27.09.2019
