Մինչեւ 20 տարեկան գերծանր քաշային ծանրորդ Վարազդատ Լալայանը բացահայտ առավելությամբ հաղթեց Բուխարեստում ընթացող Եվրոպայի երիտասարդական առաջնությունում: Նա իր մրցելույթներն սկսում էր այն ժամանակ, երբ մրցակիցներն արդեն ավարտել էին պայքարը:
Պոկում վարժությունում Վարազդատը 180 կգ ծանրաձողին առաջին անգամ մոտեցավ այն ժամանակ, երբ մյուսներն արդեն ավարտել էին իրենց գործը: Այնուհետեւ, մեր ծանրորդը սանձեց 190 ապա նաեւ 194 կգ-ն` 2-րդ տեղի հետ տարբերությունը հասցնելով ամբողջ 16 կիլոգրամի:
Նույնը կրկնվեց նաեւ հրում վարժությունում: Միայն թե պայքարելու փորձ անում էր նիդեռլանցի ծանրորդը: Այդուհանդերձ, Վարազդատը առաջին մոտեցման 220 կգ-ով լուծեց նաեւ հրում վարժության ու երկամարտի ոսկե մեդալի հարցը, իսկ երկրորդ մոտեցման 230 կիլոգրամով արծաթե մեդալակրից առավելությունը հասցրեց 33 կիլոգրամի: Վարազդատ Լալայանի արձանագրած կիլոգրամները՝ 194+230=424 կգ:
Կարդացեք նաև
Այսօր մրցահարթակ էր մտել նաեւ 109 կգ քաշային Յաշա Մինասյանը, որը հրում վարժությունում արժանացավ բրոնզե մեդալի՝ 200 կգ, իսկ երկամարտում ցույց տվեց 358 կիլոգրամ:
Աշոտ ՀԱԿՈԲՅԱՆ
