Լրահոս
Օրվա լրահոսը

Հաշմանդամություն ունեցող անձանց իրավունքների ոլորտի ՀԿ-ների հետ քննարկում. կստեղծվի Պաշտպանին առընթեր խորհուրդ

Փետրվար 28,2020 21:01

Այսօր Մարդու իրավունքների պաշտպանի նախաձեռնությամբ հանդիպում է տեղի ունեցել հաշմանդամություն ունեցող անձանց իրավունքների պաշտպանության ոլորտում գործունեություն իրականացնող հասարակական կազմակերպությունների ներկայացուցիչների հետ:

Միջոցառման ժամանակ բացման խոսքով հանդես են եկել ՀՀ մարդու իրավունքների պաշտպան Արման Թաթոյանը, ՄԱԿ-ի մշտական համակարգող Շոմբի Շարփը և Պաշտպանի աշխատակազմի Հաշմանդամություն ունեցող անձանց իրավունքների պաշտպանության բաժնի ղեկավար Մոնիկա Սարգսյանը:

Արման Թաթոյանը ներկայացրել է Մարդու իրավունքների պաշտպանի դերը հաշմանդամություն ունեցող անձանց իրավունքների պաշտպանության հարցերում, մասնավորապես՝ հաշմանդամություն ունեցող անձանց իրավունքների պաշտպանության բաժնի առաքելությունը, գործունեության ոլորտները, ինչպես նաև ՄԱԿ-ի «Հաշմանդամություն ունեցող անձանց իրավունքների մասին» կոնվենցիայիով վերապահված նոր լիազորությունները՝ որպես անկախ մշտադիտարկում իրականացնող մարմին:

Ներառական հասարակություն ունենալու ճանապարհին Մարդու իրավունքների պաշտպանը հատկապես կարևորել է հարգանքը հաշմանդամություն ունեցող անձանց արժանապատվության նկատմամբ, կյանքի բոլոր բնագավառներում ինքնուրույն և լիարժեք մասնակցությունն ապահովող միջավայրի ստեղծումը, որոշումների կայացման գործընթացում ակտիվ մասնակցությունը:

«Հաշմանդամություն ունեցող անձանց իրավունքների պաշտպանության ոլորտում մենք ունենք տարիներով կուտակված խնդիրներ՝ կարծրատիպային ընկալումներից ու խտրականությունից մինչև անարդյունավետ պաշտպանություն: Դրանց լուծման ճանապարհին սերտորեն համագործակցելու ենք ոլորտի հասարակական կազմակերպությունների, անկախ մասնագետների, լրատվամիջոցների և այլ գործընկերների հետ: Այդ նպատակով Մարդու իրավունքների պաշտպանին առընթեր կստեղծվի հաշմանդամություն ունեցող անձանց իրավունքների պաշտպանությանը նվիրված խորհուրդ»,- ասել է Մարդու իրավունքների պաշտպանը:

Հասարակական կազմակերպությունների ներկայացուցիչները ողջունել են Մարդու իրավունքների պաշտպանին առընթեր խորհուրդ ստեղծելու գաղափարը, Պաշտպանի հետ քննարկել հաշմանդամություն ունեցող անձանց իրավունքների պաշտպանության ոլորտի հիմնախնդիրները, ներկայացրել են դրանց լուծման ուղղությամբ իրենց տեսլականը:

Հիշեցնենք, որ 2019 թվականին Մարդու իրավունքների պաշտպանի աշխատակազմի քաղաքացիական, սոցիալ-տնտեսական և մշակության պաշտպանության դեպարտամենտի կազմում ստեղծվել է Հաշմանդամություն ունեցող անձանց իրավունքների պաշտպանության բաժին: Այն ապահովելու է պետական և տեղական ինքնակառավարման մարմինների ու պաշտոնատար անձանց կողմից հաշմանդամություն ունեցող անձանց խախտված իրավունքների և ազատությունների պաշտպանությունը, չհայտարարված այցերի, ինչպես նաև «Հաշմանդամություն ունեցող անձանց իրավունքների մասին» ՄԱԿ-ի կոնվենցիայի դրույթների կիրառության մշտադիտարկման Պաշտպանի գործառույթների իրականացումը։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԻ
ԱՇԽԱՏԱԿԱԶՄԻ ՀԱՆՐԱՅԻՆ ԿԱՊԵՐԻ ԲԱԺԻՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Փետրվար 2020
Երկ Երե Չոր Հնգ Ուրբ Շաբ Կիր
« Հուն   Մար »
 12
3456789
10111213141516
17181920212223
242526272829