Ինչպես տեղեկացրել ենք, երեկ Շիրակի մարզի Մարմաշեն համայնքում ֆուտբոլ խաղալիս՝ մահացել էր Վահրամբերդ համայնքի բնակիչ, 20-ամյա երիտասարդ։ Նրան տեղափոխել էին Գյումրի բժշկական կենտրոն, սակայն արդեն մահացած էր եղել։ Մահվան հանգամանքները պարզելու համար նշանակվել էր դատաբժշկական փորձաքննություն։
Մարմաշեն խոշորացված համայնքի ղեկավար Կարեն Արշակյանն Aravot.am-ին ասել էր, որ Վահրամաբերդ ու Մարմաշեն համայնքների 17-21 տարեկան երիտասարդները ֆուտբոլ են խաղացել Մարմաշենի նոր կառուցված ֆուտբոլի դաշտում, որտեղ էլ ծագել էր վիճաբանություն։
ՀՀ գլխավոր դատախազության հանրային կապերի բաժնից հենց նոր Aravot.am-ին տեղեկացրեցին, որ երիտասարդի դիակի դատաբժշկական փորձաքննության նախնական արդյունքներով, գլխի վրա բռնությամբ զուգորդված ներգործության հետքեր են հայտնաբերվել։
Շիրակի դատախազ Կարեն Գաբրիելյանի անմիջական հանձնարարությամբ հարուցվել է քրգործ՝ ՀՀ Քրեական օրենսգրքի 104 հոդվածի 1-ին մասի հատկանիշներով, այն է՝ սպանություն, ապօրինաբար մեկ ուրիշին դիտավորությամբ կյանքից զրկելը, և կասկածվող անձը վարույթն իրականացնող քննիչի կողմից արդեն իսկ ձերբակալվել է։
Կարդացեք նաև
Նշենք, որ նշված հոդվածի 1-ին կետը նախատեսում է 8-15 տարի ազատազրկում։
Մեր տեղեկություններով, ձերբակալվողը Մարմաշեն համայնքից է, անչափահաս է, դեռ 18 տարին չի լրացել։ Կան տեղեկություններ, որ 20-ամյա երիտասարդին գետին են գցել ու հարվածել են ձեռքով։
Նունե ԱՐԵՎՇԱՏՅԱՆ
