ԲՀԿ խմբակցության մի շարք պատգամավորներ վարակվել են կորոնավիրուսով:
Ինչպես հայտնի է, ԱԺ փոխնախագահ Վահե Էնֆիաջյանը հաստատել է, որ թեստի արդյունքը դրական է, հետո հայտնի դարձավ, որ վարակակիր են նաեւ ԲՀԿ խմբակցության քարտուղար Արման Աբովյանը եւ պատգամավոր Իվետա Տոնոյանը: Այսօր մեզ հետ զրույցում դրական թեստի արդյունքի մասին հայտնեց նաեւ Կարինե Պողոսյանը: Մեր տեղեկություններով, վարակը հաստատվել է նաեւ ԲՀԿ-ական Արթուր Գրիգորյանի մոտ:
Սակայն լուրեր կան, որ ի թիվս ԲՀԿ-ական այս պատգամավորների, կորոնավիրուսով վարակվել են նաեւ ԲՀԿ առաջնորդ Գագիկ Ծառուկյանն ու իր ընտանիքի անդամները:
Սակայն Aravot.am-ի հետ զրույցում Նաիրա Զոհրաբյանը չհաստատեց տեղեկությունը՝ նշելով, որ ինքը հանդիպումներ է ունենում Գագիկ Ծառուկյանի հետ ու եթե նման բան լիներ՝ կիմանար: Իսկ ինքը օրերս է թեստ հանձնել ու պատասխանը եղել է բացասական: Թեստի բացասական պատասխանի մասին կիսվել էր նաեւ ԲՀԿ պատգամավոր Շաքե Իսայանը:
Կարդացեք նաև
Նաիրա Զոհրաբյանը վստահեցրեց, որ Ծառուկյանի հետ ակտիվ հանդիպումներից հետո իրեն առողջ ու լավ է զգում ու որեւէ նման տեղեկատվություն իրեն հայտնի չէ, որ ԲՀԿ առաջնորդը կարող է վարակակիր լինել:
Հռիփսիմե ՋԵԲԵՋՅԱՆ
