Ինչպես հայտնի է, ԱԺ տասնյակ պատգամավորների մոտ հաստատվել է կորոնավիրուսով վարակվելու փաստը:
ԲՀԿ խմբակցությունից ԱԺ փոխնախագահ Վահե Էնֆիաջյանը հաստատել է, որ թեստի արդյունքը դրական է, այդ մասին հայտարարել են նաեւ ԲՀԿ խմբակցության քարտուղար Արման Աբովյանը եւ պատգամավոր Իվետա Տոնոյանը:
Քիչ առաջ մենք խոսեցինք ԲՀԿ պատգամավոր Կարինե Պողոսյանի հետ: Նա երեկ թեստ էր հանձնել ու իր մոտ նույնպես հաստատվել է վարակը, պատասխանը եղել է դրական: Պատգամավորն ասաց, որ իրեն վատ չի զգում, պարզապես երեկվանից թույլ է, ջերմություն չունի. «Իմ գործընկերների մեջ որ կային, ես էլ թեստ հանձնեցի»: Հարցին՝ հնարավո՞ր է հավաքների ժամանակ եք վարակվել՝ Կարինե Պողոսյանը պատասխանեց. «Ես ընդամենը երեկ եմ թեստ հանձնել ու իմացել, որ դրական է, չեմ կարծում, որ այդ օրերին վարակված լինեի ու ախտանշաններ չլիներ»: Կարինե Պողոսյանն ասաց, որ հիմա մեկուսացած է իր տանը՝ ընտանիքի հետ:
Նշենք, որ տեղեկություններ կան նաեւ Արթուր Գրիգորյանի եւ Ջանիբեկ Հայրապետյանի՝ վարակակիր լինելու մասին, բայց նրանց հետ դեռ չի հաջողվել կապվել, իսկ ԲՀԿ խմբակցության քարտուղար Արման Աբովյանը վստահեցրեց, որ ինքն այդ մասին որեւէ տեղեկություն չունի:
Կարդացեք նաև
Հռիփսիմե ՋԵԲԵՋՅԱՆ
