Վարչապետ Նիկոլ Փաշինյանը դավաճանների մասին հայտարարեց: Այս առնչությամբ ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն ասաց. «Ինչի դուք չե՞ք տեսել: Բնականաբար, պատերազմում լինում են նաեւ այդպիսի երեւույթներ: Դա արագ պետք է չեզոքացվի: Այդպիսի մարդիկ, որպեսզի արդարացնեն իրենց փախնելը, նաեւ սկսում են պանիկա տարածել: Կան ուժեր, որոնք մտածված պանիկա են տարածում, որովհետեւ պատերազմի մեջ կիրառվում են բոլոր հնարավոր հնարքները հակառակորդի կողմից, կամ այլ մարդկանց կողմից, որոնք թուլացնում են մեր բանակի կարողությունները»:
Հավելեց. «Դուք էլ գիտեք՝ ում նկատի ունեմ: Եկեք հասկանանք՝ բոլորս միասին կամ կերտում ենք հաղթանակը, ամեն մեկս այս պատերազմին տվել է իր ամենաթանկ բանը, մեկը՝ իր երեխային, մեկը՝ իր հորը, բարեկամին»:
Մեր դիտարկմանը, որ վարչապետի հայտարարությամբ մենք արտաքին թշնամու վրա կենտրոնանալու փոխարեն «ներքին թշնամիների» հարց ենք լուծում՝ Անդրանիկ Քոչարյանն արձագանքեց. «Ներքին թշնամիներ պետք է չլինեն ու թշնամանք հրահրողները պետք է օր առաջ լիկվիդացվեն ու նաեւ ԱԱԾ-ի խնդիրն է՝ այդպիսի տրամադրություն ստեղծողները պետք է օր առաջ քաշվեն մի կողմ, որպեսզի բանակն իր մարտական խնդիրները կարողանա լուծել»:
Կարդացեք նաև
Շարունակելով քաղաքական շրջանակների «դավաճանների» թեման՝ Անդրանիկ Քոչարյանը խոսեց shame.am կայքի հիմնադիր Արտյոմ Խաչատրյանի մասին. «Ի՞նչ էր գրել, կարդացե՞լ եք, հայրենիքի ուժն ավելացնո՞ւմ էր: Ասում էր՝ ես իմ ենթադրություններն եմ արել: Դավաճանական ենթադրությունները պետք է օր առաջ ոչնչացվեն եւ այլ ենթադրությունները պատերազմը չի ընդունվում»:
Հարցին՝ այս օրերին, երբ ընդդիմությունը համախմբված է իշխանությունների շուրջը, վարչապետի նմանօրինակ հայտարարությունը ներքաղաքական լարվածություն չի՞ առաջացնում՝ Անդրանիկ Քոչարյանը պատասխանեց. «Ընդդիմության որոշ ուժեր ասելով՝ նկատի ունեք պարոն Վանեցյանի՞ն: Որտե՞ղ է պարոն Վանեցյանը»:
Նա ասաց, որ ԲՀԿ-ի ու «Լուսավոր Հայաստանի» պահվածքը պետք է օրինակելի լինի նաեւ արտախորհրդարանական ուժերի համար:
Հռիփսիմե ՋԵԲԵՋՅԱՆ
արտյոմ խաչատրյանին դատել ռազմական դատարանի բոլոր օրենքների համաձայն։ Իսկ հիմա անմիջապես փակել նրա խայտառակ թերթը։ Պատերազմ սկսողներին լավ մատակարարեց ազգադավը։