Արդեն գրեթե երեք շաբաթ է` Արցախի Մարտունի քաղաքի բնակիչները ապաստարաններում են բնակվում, բայց չնայած դրան` չեն պատրաստվում լքել քաղաքը։
Մարիետա Մանգասարյանը սեպտեմբերի 27-ից տեղափոխվել է ապաստարան, ասում է՝ պայմանները լավ են, ամեն ինչով ապահովված են, բայց այս պահին դա էլ կարևոր չէ, միայն թե պատերազմը ավարտվի, և զինվորները տուն վերադառնան։
Կարդացեք նաև
«7:10 սկսեցին։ Պուշկաներն էին երևի գործում։ Հենց այդ օրն էլ՝ առաջին զարկերի ժամանակ էլ, ունեցանք մահեր՝ կին, երեխա։ Դե սկզբից չէինք հավատում, որ կռիվ է սկսվել, հետո, որ «Գրադ»-ով սկսեցին խփել, այդ ժամանակ արդեն սկսեցին գոռոցները, որ կռիվ է սկսել, բոլորդ փախեք ապաստարաններ։ Էդ է, եկանք մնացինք այստեղ»,- հիշում է Մարիետան։
«Գրադ»-ի արկերից փլվել է նաև իրենց տունը․ «Մի անգամ գնացել ենք, տեսել ենք՝ սաղ փլված է, եկել ենք այստեղ։ Դրա համար ախ էլ չենք հանում, ինչ ուզում է՝ լինի, մի բանը, որ ստացվում է, կառուցում է, պետք է կառուցենք, սարքենք, հետ գանք։ Չեմ էլ մտածել, որ կարող եմ այստեղից դուրս գալ, ոչ մի դեպքում․ սա մեր հողն է»։
Ամի ՉԻՉԱԿՅԱՆ
Լուսանկարները՝ Նարեկ ԱՎԱԳՅԱՆԻ
