«Կա՛նգ առ Իսրայել», «Կա՛նգ առ Թուրքիա», «Կա՛նգ առ Ադրբեջան», «Սթափվե՛ք». այսպիսի կոչերով Իսրայելի հայերը բողոքի ցույց են կազմակերպել:
Ցույցի մասնակիցները դիմում են Իսրայելի կառավարությանը՝ վերջ դնել Ադրբեջանի հետ մահացու գործարքին եւ այդ երկրին զենք չմատակարարել, քանի որ այդ զենքերը կիրառվում են Արցախում եւ Հայաստանի Հանրապետությունում նաեւ քաղաքացիական բնակչության եւ քաղաքացիական ենթակառուցվածքների դեմ, ինչն անհանդուրժելի է:
Օրեր առաջ գրավոր դիմում էր ներկայացվել Իսրայելի Գլխավոր դատարան՝ Ադրբեջանին զենքի վաճառքը դադարեցնելու պահանջով: Դիմումը մերժվել է՝ նշելով, որ չկան բավարար ապացույցներ՝ հիմնավորելու պնդումները, թե այդ զենքերն օգտագործվել են Հայաստանի եւ հայ ժողովրդի դեմ :
Ցուցարարները նաեւ հրապարակային ներկայացրեցին ապացույցները՝ Շուշիի եկեղեցու հրթիռակոծումը, քաղաքացիական հիվանդանոցի թիրախավորումը եւ բազմաթիվ բնակելի շենքերի ոչնչացումը : Ապացույցները շատ են, բայց Իսրայել պետությունը չի ցանկանում դրանք տեսնել:
Կարդացեք նաև
Ցույցի ընթացքում նաեւ դրամահավաք է իրականացվում:
Մանրամասները՝ տեսանյութում
Նելլի ԳՐԻԳՈՐՅԱՆ
