«Ցավոք, երեկ ուշ երեկոյան մարտերի ընթացքում հակառակորդին հաջողվեց գրավել Կուբաթլուն (Սանասար) եւ որոշ ուղղություններով առաջանալ»,-լրագրողների հետ ճեպազրույցում այսօր հայտարարեց ՀՀ ՊՆ ներկայացուցիչ Արծրուն Հովհաննիսյանը:
«Այսօր վաղ առավոտյան Ադրբեջանի ԶՈՒ-ն, որոնց միացած են ահաբեկչական կազմակերպություններ եւ այլ պետությունների ԶՈՒ ստորաբաժանումներ, հարավ-արեւելյան ուղղությամբ լայնամասշտաբ հարձակում ձեռնարկեցին մի քանի ուղղություններով՝ միաժամանակ հրետակոծելով եւ ռմբակոծելով Արցախի բնակավայրերը: Օրվա ընթացքում այդ հրոսակախմբերին չի հաջողվել ճեղքել ռազմաճակատը, փոխել բնագիծը, չնայած որոշ տեղերում թվացյալ հաջողություն ունենան»,-օրվա իրավիճակը ներկայացրեց նա:
Արծրուն Հովհաննիսյանի խոսքով. «Մեր ստորաբաժանումներին հաջողվել է հակագրոհով վերականգնել առաջնագիծը: Միաժամանակ, նախկինում նշված՝ Հադրութից հյուսիս գտնվող անտառների հատվածում շարունակվել են դիվերսիոն խմբերի ջախջախման գործողությունները: Որոշ դիվերսիոն խմբեր անգամ թողնելով մեքենաները՝ փախել են, բայց մի քանի գյուղերում մարտերը շարունակվում են»:
Ապա` Արծրուն Հովհաննիսյանը դիմեց հանրությանը. «Այո, հակառակորդը որոշ տեղերում ունեցավ հաջողություն: Այո, մոտեցել են Սյունիքի դարպասներին, բայց իրավիճակը ծայրահեղ չէ: Ես հավատում եմ հայ զինվորի բազկին, խելքն ու հմտությանը: Եթե նա ինչ-որ տեղ նահանջել է, շատ տեղերում փախուստի է մատնել առաջատար բանակների հատուկ ջոկատայիններին: Հաճախ ենք նահանջում, բայց դա ճակատագրական չէ: Պատերազմը սաստիկ է, բայց ոչ՝ անելանելի»:
Կարդացեք նաև
Լուիզա ՍՈՒՔԻԱՍՅԱՆ
