Ի՞նչ եք արել դուք, որ գոնե այդ կապիտուլյացիայի փաստաթուղթը ստորագրվեր շատ ավելի շուտ ու ունենայինք շատ ավելի քիչ զոհեր ու քիչ տարածքային կորուստներ: Այսօր ԱԺ-ում այս հարցն ուղղեցին «Իմ քայլը» խմբակցության պատգամավոր, Պաշտպանության եւ անվտանգության հարցերի հանձնաժողովի անդամ Արմեն Խաչատրյանին: Նա պատասխանեց. «Նախ ես դիվանագիտական կորպուսի աշխատակից չեմ, որ ինչ-որ բան անեմ, բայց առաջին օրվանից եղել եմ բանակի եւ իմ ժողովրդի կողքին, ինչ արել եմ՝ հրապարակման ենթակա չէ: Ասում եք՝ անցել է 20 օր, ինչ եք արել: Ադրբեջանին պահանջվեց 25 տարի, որ ինքը հասներ հաջողության ու այդ 20 օրը, որ դուք նշում եք, դա բավարար չէ, որ մարդը մի հատ ստուգարքի պատրաստվի կամ քննության»:
Լրագրողները հուշեցին՝ ախր 2,5 տարի իշխանության եք եղել, պատրաստվեիք, դուք չգիտեի՞ք, որ գալիս եք Ղարաբաղի խնդիրը շալակած: Նա պատասխանեց, թե հարցը փակուղի էր մտել վաղուց՝ դեռ 2016-ի ապրիլյան պատերազմի ժամանակից. «Դուք ասում եք՝ 20 օր անցել է, ի՞նչ եք արել, նման հարց կարող էր տալ փոքր երեխան»: Նա վստահեցրեց, որ 2 տարվա ընթացքում բանակում շատ բան է փոխվել, ձեռք են բերվել հակաօդային պաշտպանության միջոցներ, որը երբեւէ չի եղել, սննդի մատակարարման պայմանավորվածություն է ձեռք բերվել ու բանակում սնունդը ապահովել են նորմալ՝ անգամ պատերազմի օրերին: Դիտարկմանը, որ այդ ՀՕՊ համակարգերը ինչ վիճակում եք ձեռք բերել՝ ժանգոտված՝ Արմեն Խաչատրյանը վստահեցրեց. «Ես ժանգը չեմ տեսել»:
Խոսելով ռազմամթերքի ձեռքբերման մասին Մովսես Հակոբյանի հայտարարություններից՝ Արմեն Խաչատրյանն ասաց, որ այս պահին նրա հայտարարությունները քննարկվում են քրեադատավարական դաշտում ու պետք է պարզվի՝ պետական գաղտնիքի հրապարակումները՝ ճիշտ եւ ոչ ճիշտ, քրեական պատասխանատվության տարրեր պարունակո՞ւմ են, թե՞ ոչ:
Արմեն Խաչատրյանը նշեց, որ այս պատերազմում դասալիքները շատ-շատ են ու չի ուզում անուններ հրապարակել՝ թշնամուն չուրախացնելու համար: Բայց այդ ամենին քրեադատավարական գնահատական կտրվի:
Կարդացեք նաև
«Լուսավոր Հայաստան» խմբակցության ղեկավար Էդմոն Մարուքյանը հոկտեմբերի 11-ի նիստից մանրամասներ էր պատմել, թե ինչպես են իրենք հորդորել Փաշինյանին կանգնեցնել պատերազմը, ինչը չի արվել: Այս առնչությամբ Արմեն Խաչատրյանն ասաց. «Մի պատգամավոր էլ ես եմ եւ մինչեւ վերջին պահը ես ձգտել եմ, որ պետք է կռվել եւ հաղթանակ տանել: Կոնկրետ մեկը ես եմ ու բոլորին հորդորել եմ, որ պետք է կռվել, ոչ մի քայլ հետ»:
Դիտարկմանը, որ ԳՇ պետը ներկայացրել է իրավիճակը, ի՞նչ է նշանակում կռվել մինչեւ վերջ, երբ ԳՇ պետն ասել է՝ պետք է դադարեցնել՝ Արմեն Խաչատրյանն այսպիսի պատասխան տվեց. «Դուք պատկերացնո՞ւմ եք, այդքան ռեսուրսներ ունենալով՝ մենք հանձնվեինք, այս նույն հողերը տայինք, ի՞նչ կանեիք: Մինչեւ վերջ կռվել ենք, դուք հիմա մեղադրում եք դավաճանության մեջ, բա որ չկռվեինք, ի՞նչ կանեիք»: Զարմանքին, որ իրավիճակը գնահատվել է, որ ծանր է, եթե չկար ռեսուրս, ի՞նչ կռիվ՝ Արմեն Խաչատրյանը պատասխանեց. «Ժողովուրդ, պատերազմի ելքը ի սկզբանե ոչ շտաբի պետը կարա որոշի, ոչ Նիկոլ Փաշինյանը, ոչ Արայիկ Հարությունյանը, ոչ Իլհամ Ալիեւը, ոչ էլ Էրդողանը: Մենակ Աստված գիտի դրա վերջը ինչ կարա լինի: Դե հիմա ստացվել է՝ հարավային ուղղությամբ ճեղքում է եղել, գուցե չստացվեր ու պարտություն չկրեինք: Դուք եկել ասում եք՝ ինչի՞ չեք կանխատեսել, որ նոյեմբերի 9-ին պարտվելու էինք: 41 թվականին էլ բոլորն էին կանխատեսում, որ Ռուսաստանը պիտի պարտվեր, պարտվեցի՞ն»:
Հարցին՝ ասում եք, թե մենակ Աստված գիտի, այդ դեպքում ԳՇ-ն ինչո՞ւ է ձեւավորվում, ղեկավարությունը ինչի՞ համար է՝ նա պատասխանեց. «Զինված ուժերը կառավարելու համար»: Արմեն Խաչատրյանի խոսքով՝ ԳՇ պետի կարծիքը կարծիքներից մեկն է, նա մի բան է ասել, այլ գեներալներ՝ այլ բան. «Ես կասկածում եմ՝ ԳՇ պետը նման հայտարարություն արե՞լ է, ասե՞լ է, որ 4-րդ օրը պետք է դադարեցնել, կասկածում եմ»:
Մանրամասները՝ տեսանյութում:
Հռիփսիմե ՋԵԲԵՋՅԱՆ
