«Համոզված եմ, որ ազգի շահերը պետք է առաջնահերթ համարենք։ Ամեն հարեւան պետության հետ հարաբերությունները կառուցելիս ազգի շահերը պետք է հաշվի առնել։ Տարածաշրջանում ոչ թե սուբյեկտ, այլ օբյեկտ պետք է դառնանք»,-«Միասնական հայրենիք» կուսակցության հիմնադիր համագումարի ժամանակ այսօր Aravot.am-ի եւ A1plus-ի հետ զրույցում ասաց կուսակցության նախագահ, նախկին վարչապետ Կարեն Կարապետյանի նախկին խորհրդական, տնտեսագետ Մհեր Տերտերյանը՝ անդրադառնալով հարցին, թե հետպատերազմյան Հայաստանում, իր գնահատմամբ, Թուրքիայի հետ թշնամանքը կառավարելու վարչապետ Նիկոլ Փաշինյանի հայտարարությամբ ի՞նչ է ակնարկվում եւ ինչպե՞ս է պատկերացնում այս փուլում հայ-թուրքական հարաբերությունների վերականգնման տեսլականը։
«Կարծում եմ՝ այն պայմաններում, երբ թշնամին մեզ սպառնում է, խաղաղությունը մեզ թելադրում են։ Խաղաղության մի օր եթե պետք է հասնենք, ապա այն մեր ներքին շահերից պետք է բխի։ Ժամանա՞կն է, թե ոչ։ Չեմ կարծում, որ այսօր, վտանգված պայմաներում, երբ թշնամին Զանգեզուրով է սպառնում, կարող ենք առողջ հարաբերություններ ձեւավորել։ Դրա համար հիմքեր եւ ճիշտ կարգախոս պետք է լինեն»,-համոզմունք հայտնեց Մհեր Տերտերյանը։
Լուիզա ՍՈՒՔԻԱՍՅԱՆ
