Հայ-ադրբեջանական սահմանին երկարաժամկետ խաղաղության հեռանկարներ կան, այնուամենայնիվ, իրավիճակի սրման ռիսկերը պահպանվում են: Այս մասին հայտարարել է Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը «Անվտանգության տարածաշրջանային կառույցներ. ՀԱՊԿ» ֆորումի ժամանակ:
«Ուշադիր հետևում ենք հայ-ադրբեջանական սահմանին, հատկապես Հայաստանի Սյունիքի մարզի սահմանամերձ շրջաններում իրավիճակի զարգացմանը: Ողջունում ենք կողմերի մտադրությունը պետական սահմանի հարցերը լուծել խաղաղ ճանապարհով: Մենք այնտեղ երկարաժամկետ խաղաղության հեռանկարներ ենք տեսնում»,- ասել է Զասը՝ հավելելով նաև, որ իրավիճակի սրման ռիսկերը դեռ պահպանվում են:
Նա նշել է, որ Լեռնային Ղարաբաղի հակամարտության գոտում ռազմական գործողությունների դադարեցմանը հաջորդած կես տարվա ընթացքում ՀԱՊԿ հավաքական անվտանգության կովկասյան տարածաշրջանում նկատվում են իրավիճակի կարգավորման դրական տեղաշարժեր: Նրա խոսքով՝ ռուսական խաղաղապահ զորամիավորման մուտքը, միջազգային բանակցողների ջանքերը հիմքեր են ստեղծում երկարատև խաղաղության համար: «Իրավիճակը «դաշտում» աստիճանաբար կայունանում է: Կարևորը՝ արդեն չեն կրակում»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
