«Լավ, եկեք պատմեմ իրականությունը, թե ինչն է եղել իմ՝ Չեչնիա այցելելու պատճառը, նպատակը։ Այդ մասին մինչեւ օրս ինչ-ինչ պատճառներով չեմ խոսել։ Նախ, ինձ մեղադրեցին Չեչնիայի ղեկավարի ընկերը լինելու մեջ»,-«Երկիր մեդիա» հեռուստաընկերության «Երկրի հարցը» հաղորդաշարի եթերում այսօր հայտարարեց «Պատիվ ունեմ» դաշինքի վարչապետի թեկնածու, ՀՀ ԱԱԾ նախկին պետ Արթուր Վանեցյանը՝ անդրադառնալով 2019թ․-ին հրապարակված՝ իր եւ Չեչնիայի ղեկավար Ռամզան Կադիրովի լուսանկարին։
«Ես դա մեղադրանք չեմ համարում։ Գտնում եմ, որ Ռամզան Կադիրովն այն մարդն է, որի հետ ընկերություն անելը միայն պատիվ է բերում։ Այդ առումով որեւէ այլ մեկնաբանություն չունեմ։ Ինչ վերաբերում է հարցին, թե ինչու էի հայտնվել Չեչնիայում եւ սկսել շփվել, ընկերություն անել Ռամզան Կադիրովի հետ, ապա հայտնի է, որ ՀՀ-ն ՌԴ-ի հետ կապվող մեկ ցամաքային ճանապարհ ունի՝ Վրաստանի տարածքով, Լարսի կիրճով, որը տարվա կեսը չի գործում կամ գործում է ծանրաբեռնված, որի պատճառով մենք խնդիրներ ենք ունենում, մեր ապրանքները փչանում են։
Ուսումնասիրությունների արդյունքում պարզ դարձավ, որ Վրաստանի տարածքով հնարավոր է դեպի ՌԴ եւս մեկ ճանապարհ ունենալ, որը սահմանակից է Չեչնիայի հետ։ Վրաստանի այն ժամանակվա վարչապետ Գեորգի Գախարիան, որի հետ ես ունեմ լավ, ընկերական հարաբերություններ, հետը խոսել եմ, ասել, որ նման ճանապարհ կա, հնարավո՞ր է այն կառուցել եւ գործարկել։ Ասաց, որ իրենց կողմից հնարավոր է, եթե մենք կարողանանք պայմանավորվել ՌԴ-ի հետ։ Ես մեկնեցի Ռուսաստան, հանդիպեցի Ռամզան Կադիրովի հետ, ներկայացրի այդ ծրագիրը։ Նա հավանեց, պատրաստակամություն հայտնել կառուցել այդ ճանապարհը։ Այն սկսել են կառուցել, մնացել է ընդամենը 2 կմ տարածք։ 2 կմ տարածք կառուցելուց հետո ՀՀ-ն կունենա այլընտրանքային ճանապարհ դեպի ՌԴ։ Ճանապարհ, որտեղ ձյուն չի գալիս, որտեղ անցանելիության խնդիր չկա։ Հիմա սա լա՞վ է, թե վատ»։
Կարդացեք նաև
Լուիզա ՍՈՒՔԻԱՍՅԱՆ
