Այսօր 7-րդ գումարման ԱԺ-ի վերջին նիստն էր ու ԱԺ փոխխոսնակ, ԲՀԿ պատգամավոր Վահե Էնֆիաջյանը հրաժեշտի ելույթ ունեցավ՝ հաշվետվություն ներկայացնելով, թե ինչ է արել ինքը խորհրդարանում. «Անձամբ ես 8-րդ գումարման ԱԺ-ի ընտրություններին չեմ մասնակցել: Կարծում եմ, որ մենք պետք է ունենանք մշակույթ եւ վերաբերմունք մեր աշխատանքին, ներկային եւ հետագային՝ տեսլականի մասով: Ոնց որ մենք մուտք գործելով ԱԺ՝ որպես պատգամավորներ, երդմնակալության արարողություն ենք անցնում, նաեւ կարծում եմ, որ ճիշտ է խմբակցությունները ներկայացնեն իրեն ուղին ու պատգամավորները առանձնապես հաշվետվողականությամբ հանդես գան: Իմ համախոհների ու համակիրների կողմից տեսնում եմ, որ այս պահանջարկը կա, ուզում եմ մի քանի վիճակագրական թվեր ներկայացնել: Այս խորհրդարանական գործունեության ընթացքում իմ կողմից գրություններ ու հարցումներ են ուղարկվել 1200, որից 75%-ը դրական լուծում են ստացել: 300-ից ավելի գրություններ են ուղարկվել միջազգային կառույցներ, միջխորհրդարանական վեհաժողովներ, տարբեր լսումներ են կազմակերպվել խորհրդարանում, հարցազրույցներ: «Բաց դաս» ծրագրի շրջանակում 51 հանդիպում ենք ունեցել բուհերի եւ դպրոցների ներկայացուցիչների հետ, ունեցել եմ շուրջ 50 օրենսդրական նախաձեռնություններ, հանդիսացել եմ եւ հեղինակ, եւ համահեղինակ»:
Էնֆիաջյանն ասաց, որ մի շարք նախագծեր էլ ունի, որ դեռ չի հասցրել շրջանառության մեջ դնել, 8-րդ գումարման ԱԺ-ում կտեսնի՝ որ պատգամավորի հետ կհամագործակցի ու դրանք օրենք կդարձնի: Մասնավորապես, մանկապարտեզների վարձավճարները հանելու, գյուղհարկերի, պատերազմից տուժածների սոցիալական վիճակի բարելավման նախագծերի մասին է խոսքը:
Վահե Էնֆիաջյանը շնորհակալություն հայտնեց իրեն երբեւէ քվե տված քաղաքացիներին ու ԲՀԿ նախագահ Գագիկ Ծառուկյանին:
Ամփոփելով ելույթը՝ Էնֆիաջյանն արտասանեց Թումանյան. «Գործն է անմահ, լավ իմացեք, որ խոսվում է դարեդար, երնեկ նրան, ով իր գործով կապրի անվերջ, անդադար»:
Կարդացեք նաև
Հռիփսիմե ՋԵԲԵՋՅԱՆ
