Այսօր Ազգային ժողովում պաշտպանության նախկին փոխնախարար, ՔՊ խմբակցության պատգամավոր Գագիկ Մելքոնյանի աշխատասենյակ բերեցին սպարապետ Վազգեն Սարգսյանի նկարը՝ շրջանակի մեջ դրված:
Մելքոնյանի աշխատասենյակում արդեն դիմացի պատին կախված էր վարչապետ Նիկոլ Փաշինյանի նկարը, իսկ գլխավերեւում տեղ էր պահած սպարապետի նկարի համար: Ինչպես հետո պարզվեց՝ փոխնախարար եղած ժամանակ իր աշխատասենյակում կախված նկարն է, տեղափոխել է ԱԺ:
Կարդացեք նաև
Մելքոնյանը օգնականին հորդորեց շուտ մեխ ու ուրագ ճարել ու նկարը կախել: Հետո չհամբերեց, պահարանից հանեց սովորական ապակե մի բաժակ ու որոշեց անձամբ մեխը մեխել ու Վազգեն Սարգսյանի նկարը կախել:
Ի դեպ, նախկինում պատգամավոր Նիկոլ Փաշինյանը դեմ էր, երբ պաշտոնյաները իրենց աշխատասենյակներում կախում էին Սերժ Սարգսյանի նկարը: Հեղափոխությունից հետո անգամ խուլ ու հեռավոր գյուղերում գյուղապետերի աշխատասենյակների պատը տեւական ժամանակ մնաց «դատարկ»: ԱԺ ամբիոնից Փաշինյանը հեգնում էր, թե՝ «ձեր կարծիքով Սերժ Սարգսյանի նկարները իրենց սենյակներում ինչի՞ էին կախում, նրանք անընդհատ խոսում են…Դատախազները, քննիչները կաբինետներում զեկուցում են, հարցնում են՝ այս սպանությունը քրեակա՞ն հանցագործություն է, թե՞ ոչ, եւ Սերժ Սարգսյանի նկարը նրանց բացատրում է՝ որ սպանությունն է քրեական, որ սպանությունը՝ ապաքրեական: Այնպես որ այդ նկարը մշտական կապի խնդիր է, ամեն օր իրիկունները զեկուցում են, առավոտները հրահանգ են ստանում»:
ԱԺ-ում ԶԼՄ-ների տեղաշարժի սահմանափակումներից հետո մի քիչ դժվար է դարձել պատգամավորների աշխատասենյակներ մտնել, բայց ՔՊ-ական որ պատգամավորի մոտ հաջողվել է լինել, Նիկոլ Փաշինյանի նկարը կախված է եղել:
Հռիփսիմե ՋԵԲԵՋՅԱՆ
