Հունվարի 1-ից ջրի սակագինը 1 խմ-ն 20 դրամով կարող է բարձրանալ: Այսօր այս մասին լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Գարեգին Բաղրամյանը։ Ըստ նրա, սակագնի բարձրացման հայտը, տրվել է սակագինը 43 դրամով բարձրացնելու համար՝ ամբողջ բնակչության համար, սակայն փոփոխությունը չի վերաբերի բնակչության սոցիալապես անապահով խավին: Հանձնաժողովի նախագահն ասաց, որ նրանց համար սակագինը կլինի 1 խմ-ն 180 դրամ:
«Բնակչության մյուս շերտերի դեպքում մենք առաջարկում ենք սուբսիդավորման փոխարեն մտցնել կայուն քաղաքականություն 10 տարվա ընթացքում։ Դա նշանակում է, որ սակագինը կարող է տատանվել 1-2 դրամի սահմաններում»,-ասաց Գարեգին Բաղրամյանը:
Նրա խոսքով, ըստ պայմանագրի, ջրամատակարար ընկերությունը ամեն տարի պարտավոր է ներկայացնել սակագնի վերանայման հայտ՝ հաշվի առնելով այդ տարվա համար նախատեսված բազիսային գինը, սղաճի տեմպը, Էլեկտրաէներգիայի փոփոխության եւ ջրի ծավալների փոփոխության դեպքում:
Դիտարկմանը, թե Նիկոլ Փաշինյանը նախընտրական քարոզչության ժամանակ խոստում էր տվել՝ չբարձրացնել կոմունալ ծառայությունների սակագները, պարոն Բաղրամյանն ասաց, որ պայմանավորվածությունների խախտում սակագնի վերաբերյալ տեղի չի ունեցել: Ըստ նրա, գոյություն ունի բանաձեւ, որն էլ հաշվում են բազիսային գնին ավելացնելով սղաճը, ջրի փոփոխության ու էլեկտրաէներգիայի գործոնները:
Կարդացեք նաև
Լուսինե ԲՈՒԴԱՂՅԱՆ
