Այսօր «Հայ աղջիկների առաջնորդությունը ֆուտբոլում» (GOALS) կազմակերպությունը ԵՊՀ մարզադահլիճում բաց դռների օր էր կազմակերպել՝ նպատակ ունենալով գերազանցապես մանկահասակ աղջնակների համար ֆուտբոլ մարզաձեւին ծանոթանալու, ֆուտբոլի միջոցով միմյանց հետ շփվելու, ակումբներին անդամագրվելու հնարավորություն ընձեռել:
«Հայ աղջիկների առաջնորդությունը ֆուտբոլում» ՀԿ նախագահ Թենի Ավագյանը Aravot.am-ին ասաց. «Մեր կազմակերպության նպատակը ֆուտբոլի միջոցով սոցիալական ազդեցություն ունենալն է: Հանրապետության ութ մարզերի 80 համայնքում աշխատում ենք հիմնականում 12-17 տարեկան ավելի քան հազար աղջիկների հետ: Ամբողջ նպատակն է՝ սպորտի միջոցով սովորեցնել առաջնորդության հմտություններ, թիմային աշխատանք, այսինքն, այնպիսի որակներ, որոնք պետք են ոչ միայն սպորտում, այլեւ կյանքում հաջողության հասնելու համար: Ինչո՞ւ ենք մարզային համայնքներում աշխատում հենց աղջիկների հետ: Որովհետեւ իրականում այդ տարիքի աղջիկները ամենախոցելի խումբն են հատկապես մայրաքաղաքից հեռու գտնվող բնակավայրերում, առավել եւս՝ հետպատերազմյան ու COVID-ի ներկայիս ժամանակահատվածում: Ու բացի առողջ ապրելակերպը եւ նշածս հմտությունները սպորտի միջոցով մատուցելուց, շատ կարեւոր է, որ մեր երեխաները ունենան մի ապահով տեղ, որ թեկուզ շաբաթը երկու անգամ մեկական ժամով հոգսերը վայր դնեն ու լինեն ընդամենը երեխա:
Կարդացեք նաև
Միջոցառմանը ներկա էր ֆուտբոլի Հայաստանի ազգային հավաքականի գլխավոր մարզիչ Խոակին Կապառոսը: Իսպանացի մասնագետը ողջունեց այս նախաձեռնությունը, նշեց, որ սպորտը, մասնավորապես, ֆուտբոլը, ոչ միայն օգնում է երեխաներին առողջ լինել, այլեւ մարզական կարգապահություն է դաստիարակում, ինչը պետք կգա ամբողջ կյանքում ինչ-որ բաների հասնելու համար: Հարցին, թե Հայաստանում ենթակառուցվածքները բավարարո՞ւմ են, որպեսզի ֆուտբոլը սկսած փոքր տարիքից զարգանա մինչեւ գոնե սիրողական մակարդակ, Կապառոսը պատասխանեց. «Կարծում եմ, ենթակառուցվածքները զարգանում են ոչ միայն Երեւանում, այլու մարզերում: Եվ ներդրումները սպորտում ներդրում են երեխաների ապագայում: Երեխաները իրենց հետագա կյանքում կունենան հստակություն եւ առողջ ապագա, թեկուզ միայն այն բանի շնորհիվ, որ զբաղվել են սպորտով վաղ տարիքից սկսած»:
Աշոտ ՀԱԿՈԲՅԱՆ
