Այս տարի լրանում է ԵՄ–Հայաստան Համապարփակ եւ ընդլայնված համագործակցության համաձայնագրի ստորագրման չորս տարին: ՀՀ արտգործնախարարության Եվրոպայի վարչության պետ Տիգրան Սամվելյանն այսօր Հանրային լրագրության ակումբի կազմակերպած քննարկման ընթացքում ներկայացրեց համաձայնագրի կատարման ընթացքը: Ըստ նրա, այս փաստաթուղթը Հայաստան-Եվրամիություն փոխհարաբերությունների սահմանադրությունն է. «Սա այն հիմնարար փաստաթուղթն է, որը համակարգում է ՀՀ-ԵՄ փոխհարաբերությունները: Փաստաթուղթն անդրադառնում է մեր կյանքի բոլոր ոլորտներին: Այս համաձայնագրով Հայաստանի օրենսդրական դաշտը պետք է մոտարկվի եվրոպական չափանիշներին»:
Տիգրան Սամվելյանի խոսքով, սակայն քովիդով պայմանավորված՝ որոշ գործընթացներ դանդաղեցին:
Նշենք, որ համաձայնագիրն իր ամբողջ ծավալով ուժի մեջ է մտել 2021 թվականին:
Թե, ե՞րբ Հայաստանի քաղաքացիներն իրենց կյանքի տարբեր ոլորտներում կզգան համաձայնագրի օգուտները, Տիգրան Սամվելյանն ասաց, որ կան զգալի չափով գործողություններ, որոնց արդյունքը շոշափելի կարող է լինել որոշակի ժամանակի կտրվածքով: Օրինակ՝ բնապահպանության ոլորտում, որի արդյունքը ապագայում կերեւա, սակայն կան դրույթներ, որ շատ հստակ եւ շատ արագ տեղի են ունենում:
Կարդացեք նաև
Ըստ Գլոբալիզացիայի եւ տարածաշրջանային համագործակցության կենտրոնի ղեկավար Ստեփան Գրիգորյանի, պատերազմից ու կորոնավիրուսից հետո համաձայնագիրն ավելի շատ է կարեւորվում, քանի որ ունենք ինստիտուցիոնալ խնդիրներ, որոնց մի մասն առաջ եկան քովիդից ու պատերազմից հետո: Ստեփան Գրիգորյանը գտնում է, որ համաձայնագրի կատարման ընթացքը պետք է արագացվի՝ անկախ այնտեղ նշված ժամկետներից, որպեսզի կարողանանք օգտագործել փաստաթղթի ֆինանսական եւ փորձագիտական հնարավորությունները:
Ստեփան Գրիգորյանը հետաքրքրվեց՝ փաստաթղթում ո՞ր մասն է, որ մնացել է ԱԳՆ-ի գործառույթների տիրույթում: Ի պատասխան, Տիգրան Սամվելյանն ասաց, որ ներածական մասում կա Լեռնային Ղարաբաղի հակամարտության անդրադարձ, ահաբեկչության դեմ պայքարը, հետընդունման՝ ռեադմիսիայի մասին համաձայնագիրը, որը որոշ չափով ԱԳՆ-ինն է:
Ստեփան Գրիգորյանը նաեւ հարցրեց՝ ԵՄ գործընկերների հետ առաջիկա գագաթաժողովին, որին պետք է մասնակցեն նաեւ Ադրբեջանի եւ Հայաստանի նախագահները, նախատեսվո՞ւմ է ինչ-որ փաստաթղթի ստորագրում՝ ինչպիսին օրինակ՝ ավիացիոն համաձայնագիրն էր ԵՄ-ի հետ: Պարոն Սամվելյանը պատասխանեց, որ իր տեղեկություններով, դեկտեմբերի 16-ին կայանալիք հանդիպումներում կնքվելիք որեւէ համաձայնագիր կամ պայմանագիր չկա:
Ինչ վերաբերում է Ադրբեջանի եւ Հայաստանի առաջնորդների հանդիպմանը, ըստ Տիգրան Սամվելյանի, ինքը որեւէ տեղեկություն չունի:
Հարցին՝ տեղյա՞կ է արդյոք, Ադրբեջանի հետ ինչ-որ փաստաթուղթ ծրագրվա՞ծ է ստորագրել այդ գագաթաժողովի ընթացքում, որը չի առնչվում Արցախի հարցին, այլ՝ ԵՄ-Ադրբեջան շրջանակում է, պարոն Սամվելյանն ի պատասխան ասաց՝ Ադրբեջանը եւս բանակցային փուլում է ԵՄ-ի հետ իր համաձայնագրի մասով, որը պատրաստ լինելու դեպքում պետք է ստորագրվի, բայց թե երբ՝ տեղյակ չէ:
Լուսինե ԲՈՒԴԱՂՅԱՆ
