Առողջության պարտադիր ապահովագրությունը լինելու է այս տարվա գլխավոր բարեփոխումը։ Այս մասին այսօր հրավիրված ասուլիսում ասաց առողջապահության նախարար Անահիտ Ավանեսյանը։ Նրա խոսքով՝ նախագիծը մշակման փուլն անցել է, հայեցակարգը ներկայացրել են կառավարությանը, որը քննարկման փուլում է․ «Երբ կձեւավորվի միասնական ընկալում, պիտի առաջ գնանք։ Այս բարեփոխումը մենք դիտարկում ենք համակարգային մի քանի այլ բարեփոխումների մեջ, ոչ թե առանձին։ Եթե մենք չապահովենք առաջնային օղակի հզորացումը, շատ բարդ է լինելու ապահովագրական համակարգի սահուն ներդրումը։ Ուստի, առաջիկա 1-2 տարում, թե՛ կապիտալ ծախսերի, թե՛ բժշկական օգնության որակի հսկման, թե՛ ֆինանսավորման մեխանիզմների փոփոխության առումով պոլիկլինիկաները լինելու են մեր ուշադրության կենտրոնում»։
Ըստ նախարարի, բարեփոխման համար կարեւոր բաղադրիչը էլեկտրոնային առողջապահության ամբողջական ներդրումն է․ «Վերջին երկու տարիներին մեր տեղեկատվական համակարգի ծավալն էապես փոխվել է։ Մենք այս երեկու տարիների ընթացքում պետք է ունենանք բժշկական տվյալների պարտադիր ներմուծում Արմեդ համակարգում, որպեսզի կարողանանք իրականացնենք վերահսկողություն եւ ճշգրիտ տվյալների ամփոփում, որը հնարավորություն կտա քաղաքականության լավարկմանը»։
Նելլի ԲԱԲԱՅԱՆ
