«54%-ի կարծիքով՝ փաստորեն ճիշտ ուղով ենք տանում երկիրը, մեզ ընտրել է 54%-ը»,-այսօր այս մասին կառավարության նիստից հետո լրագրողների հետ ճեպազրույցում ասաց էկոնոմիկայի նախարար Վահան Քերոբյանն, անդրադառնալով դիտարկմանը, թե Միջազգային հանրապետական ինստիտուտի հարցումներով՝ ՀՀ բնակչության 46%-ի կարծիքով՝ երկիրը ընթանում է «սխալ ուղղությամբ»։
Ներդրումների մասին հարցին ի պատասխան էլ Քերոբյանը նշեց Ապարանի մարզի Եղիպատրուշ համայնքում լեռնադահուկային համալիրը, որի ներդրումային ծրագրին այսօր կառավարությունը հավանություն տվեց, կնքվել է 24 միլիոն եվրո արժողությամբ պայմանագիր՝ ճոպանուղի ձեռք բերելու համար։
Մամուլը գրել էր, որ այս ընկերությունը կապ ունի Միհրան Պողոսյանի՝ «Քեթրինի Միհրանի» հետ, սակայն այսօր Քերոբյանը հերքեց այդ լուրը։
Նախարարն ասաց, որ վերջին ամիսներին եվրոպական ընկերություններն իրենց գործարանները Չինաստանից տեղափոխում են ավելի մոտ տարածաշրջաններ, այդ թվում՝ Հայաստան․ «Օրինակ` իտալական խոշոր Լաբոտեկա ընկերությունը, որը հյուրանոցային տեքստիլի խոշոր արտադրություն է, Չարենցավանում արտադրամաս է հիմնել, որտեղ կարում են խալաթներ, չստեր, սրբիչներ եւ այլն»։
Կարդացեք նաև
«Վաղն էլ իտալական չորս ընկերության ներկայացուցիչների հետ եմ հանդիպելու, ովքեր տարբեր ծրագրեր են ուզում ներդնել Հայաստանում»,-ասաց նախարարը։
Հայ-թուրքական սահմանի բացման եւ թուրքերի՝ ՀՀ-ում կապիտալի գնման վտանգների մասին հարցին ի պատասխան էլ Քերոբյանն ասաց, որ թուրքերը միշտ էլ ՀՀ-ում կապիտալ են ձեռք բերել։ Նա վստահեցրեց, որ այդ տվյալները կան կադաստրում․ «Թուրքերը միշտ էլ գնել են անշարժ գույք, ընկերություններ»։
Հարցին՝ արդյոք օրենք մշակում են, որպեսզի բաց սահմանների դեպքում թուրքերը հնարավորություն չունենան ռազմավարական օբյեկտներ գնել, նախարարը պատասխանեց, որ այս պահին նման օրենք չեն մշակում․ «Մեր նպատակը ոչ թե փակելն է տնտեսությունը, այլ՝ ուժեղացնել, որպեսզի այդ միջավայրում կարողանանք ունենալ մրցունակ ընկերություններ»։
Նելլի ԲԱԲԱՅԱՆ
