«Վիճակը ծայրահեղ ծանր է։ Պաշտոնական տեղեկատվությունը, ցավոք, մեծամասամբ խեղաթյուրված է եւ չի արտացոլում Արցախում առկա իրական պատկերը։ Զարհուրելի է, երբ մենք փորձում ենք տեղեկություն ստանալ ՌԴ եւ Ադրբեջանի ՊՆ-ներից»,- «Հայելի» մամուլի ակումբում լրագրողների հետ հանդիպմանն այսօր ասաց «Անվտանգություն եւ ժողովրդավարություն» ՀԿ-ի նախագահ Նաիրա Զոհրաբյանը։
Նա հարցադրում արեց՝ ՌԴ եւ Ադրբեջանի պաշտպանական գերատեսչությունների հաղորդագրությունների ֆոնին ո՞ւր է ՀՀ պաշտպանության նախարարությունը եւ նախարարը․ «Նա զբաղված էր Վեդիում ընտրություններ կազմակերպելով՝ մի երկրի նախարար, որն Արցախի անվտանգության երաշխավոր երկրի պաշտոնյա է։ Նա այսօր Արցախում պետք է լիներ, ոչ թե մեկ Շոյգուն խոսեր, մեկ՝ Ադրբեջանի ԱԳՆ-ն կամ Զաքիր Հասանովը։ Արցախում իրականում կատարվում է հետեւյալը․ այո, Փառուխը ռուսական ուժերի վերահսկողության ներքո է, բայց Փառուխն ադրբեջանցիների համար զրո նշանակություն ունի․ նրանք մինչեւ խաղաղապահների՝ Փառուխում ամբողջական տեղակայումը հասցրել են ճանապարհներ, կածաններ բացել դեպի Քարագլուխ բարձունք, որը ռազմավարական է»։
Նաիրա Զոհրաբյանի խոսքով․ «Հենց այս պահին կածաններով տեղափոխում են մեքենաներ։ Խաղաղապահները փորձել են արգելակել, որպեսզի Փառուխի միջով տեխնիկայի տեղաշարժ չլինի, բայց զարտուղի՝ Փառուխի կողքերով բացած ճանապարհներով տեղափոխում են։ Իրականությունից չպետք է փախնել։ Զարտուղի կածաններով ադրբեջանական զինուժն ամրանում է Քարագլխի դիրքերում։ Քարագլխի հանձնումը կնշանակի, որ Ստեփանակերտի օդանավակայանը, Իվանյանը, Ասկերանը լինելու են վերահսկողության ներքո»։
Ըստ Նաիրա Զոհրաբյանի՝ ՀՀ անվտանգության խորհրդի հայտարարությունը վկայում է, որ Ադրբեջանն է ՀՀ-ին պարտադրում խաղաղության պայմանագիր, իսկ դա նշանակում է, որ ՀՀ-ն պետք է ընդունի Արցախն Ադրբեջանի կազմում․ «Այլապես գոնե մեկ նախադասություն կլսեինք Արցախի կարգավիճակի մասին։ Մեծ է նոր պատերազմի վտանգը։ Փարիսեցիություն անողները պնդում են, թե խուճապ տարածել պետք չի։ Այդպիսիք պատերազմի ժամանակ ձայնային հաղորդագրություններ էին տարածում, թե Գետաշենը վերցրել ենք։ Պատերազմից 5 է պակաս։ Ադրբեջանը հրաժարվելու է վերադառնալ ելման կետ, ենթադրում եմ, իսկ դա նշանակում է նոր էսկալացիա»։
Կարդացեք նաև
Լուիզա ՍՈՒՔԻԱՍՅԱՆ
