Սյունիքի մարզի ընդհանուր իրավասության դատարանի դատավոր Կարեն Հակոբյանի որոշմամբ երկու ամսով կալանավորվել է 19-ամյա Վ․ Խաչատրյանը, որը կասկածվում է ՀՀ քրեական օրենսգրքի 373-րդ հոդվածի 3-րդ մասի հատկանիշներով՝ զենքի հետ վարվելու կանոնները խախտելու հետևանքով անզգուշությամբ մարդու մահ առաջացնելը։
Հիշեցնենք, որ ըստ պաշտոնական հաղորդագրության, ապրիլի 28-ին ժամը 19:20-ի սահմաններում ՀՀ ՊՆ N զորամասի պահպանության տեղամասի մարտական դիրքում պարտադիր ժամկետային զինծառայողի կողմից զենքի օգտագործման կանոնների խախտման հետևանքով Սամվել Սանեյանին պատճառվել է հրազենային մահացու վիրավորում:
Դատարանին կալանավորման միջնորդություն ներկայացրած քննիչը միայն մեկ հիմնավորում էր ներկայացրել՝ նշելով, որ Վ․ Խաչատրյանը, մնալով ազատության մեջ, կարող է խոչընդոտել գործի նախաքննությանը։
Վ․ Խաչատրյանի պաշտպան Մուշեղ Վարդանյանն առարկել է քննիչի միջնորդությանը՝ փաստելով, որ իր պաշտպանյալը ինքնախոստովանական ցուցմունք է տվել, աջակցել է քննությանը, եւ գործում չկա որեւէ փաստարկ, ըստ որի իր պաշտպանյալը կխոչընդոտի քննությանը։ Մեզ հետ զրույցում Մուշեղ Վարդանյանը նախ ցավակցեց Սամվել Սանեյանի հարազատներին։
Կարդացեք նաև
«Գիտեք, աբսուրդն այն է, որ մարդն ընդունում է մեղքը, ասում է, որ ինքն է արել, նաեւ մի քանի հանգամանքներ կան, որոնք նախաքննական գաղտնիք են ու այս պահին չեմ կարող հրապարակել։ Այս ամենը հաշվի առնելով՝ դատարանը, կարծում եմ, խափանման այլ միջոց պիտի կիրառեր»,-Aravot.am-ի հետ զրույցում նշում է Մուշեղ Վարդանյանը։
Պաշտպանի խոսքով, դատական պրակտիկայում քիչ են հանդիպում նման հիմքերով կալանավորման դեպքերը։ «Գուցե՞ Կարեն Հակոբյանը վերջերս է նշանակվել մինչդատական վարույթում գտնվող գործերի խափանման միջոցը քննող դատավոր ու անկախ ամեն ինչից՝ պիտի կալանավորման որոշումներ կայացնի»,-ասում է Մ․ Վարդանյանը։
Մուշեղ Վարդանյանը Սյունիքի մարզի ընդհանուր իրավասության դատարանի որոշումը բողոքարկելու է վերաքննիչ քրեական դատարան։
Արմեն ԴԱՎԹՅԱՆ
