Երթից հետո «Դիմադրության» շարժման նախաձեռնած հանրահավաքի մասնակիցները կրկին վերադարձան Ֆրանսիայի հրապարակ: Հավաքի մասնակիցներին կրկին հիշեցրին, որ քաղբանտարկյալներին աջակցելու համար ստորագրահավաքը շարունակվում է կողքի վրանում:
Այնուհետեւ ելույթ ունեցավ Արամ Վարդեւանյանը. «Մի քանի բան եմ ուզում ձեզ պատմել, առաջինն, իհարկե, ոստիկանական գործողությունների վերաբերյալ: Մենք երեկ տեսանք ոստիկանական բարբարոսության ամենաբարձր մակարդակը, եւ դա նորից մի քանի ոստիկաններն էին: Խոսքը 60-80 ոստիկանի մասին է, որոնցից յուրաքանչյուրին ֆիքսում ենք, որոնցից յուրաքանչյուրի պատասխանատվությունն անխուսափելի է լինելու: Ժողովուրդը պահանջ դրեց, որ դրանց պետք է մեկուսացնեն, ու իրենք այսօր մեկուսացած էին: Այսօր մեր քայլերթը լրիվ ուրիշ էր, եւ ձեր շնորհիվ»,-ասաց նա:
«Երեկ չակերտավոր իրավապահ մարմինները ձերբակալեցին 44-օրյա պատերազմի հերոս զոհված տղերքից Մխիթար Գալեյանի հորը եւ հորեղբորը: Ծնողների, ժողովրդի եւ բոլորս ճնշման արդյունքում Մխիիթար Գալեյանի հոր ձերբակալումը երեկ վերացվեց,բայց Մխիթարի հորեղբորը ձերբակալած պահեցին, ու հենց այս պահին դատարանը քննեց ձերբակալման դեմ բողոքը, հիմա գտնվում է խորհրդակցական սենյակում: Եկեք միասին ասենք, որ չի կարող բարոյականության ճգնաժամ լինել, նման դեպքերով մարդ անիմաստ կալանավորվել, չի լինելու այդպես: Պետք է ազատ արձակվի»,-ասաց Վարդեւանյանը:
Նա անդրադարձավ նաեւ գույքահարկի ռեֆորմին. «Ես ուզում եմ ի քանի պարզաբանում բերել, որ դուք պատկերացնեք, թե ոնց պետք է լինի այդ ռեֆորմը: Այն մարդը, որը տարիներով իր տատիկ-պապիկի հետ ապրել է մի շենքում, այդ շենքը ինչ-որ էլիտար ու չգիտեմ ինչ շենք չէ, ուրեմն ինչի համար իր գույքահարկը բարձրանա: Կամ ժառանգություն ստացած գույքը սովորական մի շենքում, ինչի գույքահարկը բարձրանա: Գույքահարկը բարձրանալու է էլիտար շենքերի, թանկ տների համար, բայց նորմալ սովորական պայմանների համար ինչի՞ բարձրանա, չի լինելու այդպես»:
Կարդացեք նաև
Արամ Վարդեւանյան ասաց, որ հանձնառություն ունեն ստեղծելու այն մթնոլորտը, որ այլեւս անպատասխանատվություն կամ պատասխանատվությունից խուսափելու վիճակ չլինի, մարդկանց չպիտակավորեն, չասեն՝ գյումրեցի, արցախցի, վանաձորցի…
Գոհար ՀԱԿՈԲՅԱՆ
