Այսօր Երեւանի ընդհանուր իրավասության դատարանի Կենտրոն նստավայրում դատավոր Մնացական Մարտիրոսյանի նախագահությամբ պետք է լիներ Ավետիք Չալաբյանի գործով դատական նիստը։ Սակայն, ինչպես տեղեկացրել ենք, Չալաբյանը առողջական խնդիրների պատճառով չէր եկել դատական նիստին: Դատավորը հայտարարեց, որ մեղադրյալի բացակայության պայմաններում դատական նիստը պետք է հետաձգվի ու չնայած պաշտպանական կողմը հայտարարություն էր ուզում անել՝ թույլ չտվեց՝ ասելով, որ նիստն ավարտված է:
Հիշեցնենք, որ «ԱրԱր» հիմնադրամի համահիմնադիր, «Համախմբում» շարժման անդամ Ավետիք Չալաբյանը մեղադրվում է երկու կամ ավելի անձանց հավաքներին մասնակցելու նպատակով նյութապես շահագրգռելու համար։
Կարդացեք նաև
Չալաբյանի պաշտպան Վարազդատ Հարությունյանը լրագրողների հետ զրույցում ասաց, որ կալանավայրից է գալիս, խոսել է բուժմասի աշխատողների հետ. «Նրանք հայտնեցին, որ Չալաբյանի մոտ զարկերակային ճնշման խնդիր է, նաեւ տաքություն ունի: Չալաբյանը պնդել է, որ պետք է մասնակցի նիստին: Երկարատեւ բանակցություններից հետո բժիշկներն ի վերջո կտրուկ արգելել են, ասել են՝ իրավունք չունենք քեզ թույլ տանք մասնակցել դատական նիստին: Չալաբյանի հետ խոսել եմ, ոտքի վրա է, նորմալ է, բայց ունի ճնշում եւ տաքություն»:
Այսօր ժամը 21:00-ցի հետո նա պետք է ազատ արձակվի, քանի որ կալանքի ժամկետը լրանում է այդ ժամին, իսկ նոր դատական ակտ, որով խափանման միջոց կկիրառվեր, չկա:
Հռիփսիմե ՋԵԲԵՋՅԱՆ
