Գյումրիում մի քանի ժամ է՝ փոթորկախառն առատ ձյուն է տեղում։ Այն թեև դժվարանցանելի է դարձրել փողոցները, այդուհանդերձ փոքր-ինչ փոխել է այս քաղաքի բնակիչների տրամադրությունը․ նրանք սկսել են տեսանյութեր ու լուսանկարներ հրապարակել սոցիալական ցանցերում՝ քաղաքի տարբեր անկյուններից՝ գրելով․ «Վերջապես»։
«Գյումրվա ավանդական թիփին»,-այսպես է վերնագրել իր տեղադրած լուսանկարը Շիրակի նախկին մարզպետ Տիգրան Պետրոսյանը։
Խոսուն մի լուսանկար էլ Գյումրու պատմական Ռուսթավելի փողոցի այսպես ասած՝ եվրոպական հատվածից հրապարկել է Գյումրիում Իտալիայի նախկին պատվո հյուպատոս Անտոնիո Մոնտալտոն՝ գրելով «Գյումրի» ու իր հետևորդներին հնարավորություն տալով վայելելու այս քաղաքի գեղեցկությունը։
Կարդացեք նաև
Տեղումներից զուրկ հունվար ամսից հետո անդադար տեղացող ձյունն անասելի ուրախություն է առաջացրել․ Գյումրիի որոշ տեղանքներով շրջելիս՝ թվում է, թե հայտնվել ես հեքիաթի մեջ, կախարդական մի բացիկում։
Ձյունն, իհարկե, նաև անհարմարություններ է ստեղծել վարորդների, Ամասիա, Աշոցք ուղևորվողների համար։
Ինչպես տեղեկանում ենք, Շիրակի մարզպետարանի պաշտոնական լրահոսից, Աշոցքի և Ամասիայի տարածաշրջաններում բուք է, ճանապարհները՝ դժվարանցանելի։
«Շիրակի մարզի տարածաշրջանների բոլոր ավտոճանապարհներին առատ ձյան տեղումները շարունակվում են։
Աշոցքում և Ամասիայում բուք է, ճանապարհները` դժվարանցանելի։
Բուք է նաև Ջաջուռի և Քեթիի լեռնանցքներում, Մարալիկ–Լանջիկ–Մաստարա հատվածում։
ՀՀ միջպետական, հանրապետական, մարզային նշանակության ավտոմոբիլային ճանապարհները դժվարանացանելի են։
Ճանապարհներին առկա է մերկասառույց։
Սպասարկող ընկերություններն աշխատում են արտակարգ ռեժիմով։
Վարորդներին կրկին հորդորում ենք երթևեկել միայն խիստ անհրաժեշտության դեպքում և ձմեռային անվադողերով», գրված է մարզպետարանի ֆեյսբուքյան էջում:
Նունե ԱՐԵՎՇԱՏՅԱՆ
