Պաշտպանության նախարարության նախկին շենքի արդեն նախկին բնակիչներն այսօր բողոքի ակցիա էին իրականացնում ՀՀ կառավարության շենքի դիմաց:
Լրագրողների հետ զրույցում, նրանք ևս մեկ անգամ նշեցին, որ ՊՆ նախկին շենքից իրենց դուրս հանելուց հետո, վրանների մեջ պատսպարվելով իրենք զրկված են նույնիսկ ամենատարրական կենցաղային պայմաններից:
«Մենք մեր պահանջները ներկայացրել ենք առաջին օրը, թե ինչ պետք է արվի, որ լուծումը ժամանակավոր չլինի, հիմա , նույն մեր այս պահանջները ներկայացրեցինք կառավարությանը, մեզ ընդունեց կարծեմ նամակների բաժնից Ղազարյանը, կարծեմ, չեմ հիշում ազգանունը ու խոստացավ քննարկել մեր հարցը: Երկրորդ օրը եկել է սոցապ նախարարության մի աշխատակից, բերել է 13 տան բանալի է, թե ինչ կրիտերիաներով է 13 բանալի բերել, անհասկանալի է, երբ որ այնտեղ կար 117 բնակարան, կամ սոցապի աշխատակիցը 5-6 ամիս է գալիս-գնում է, ինքը չէ՞ր կարող նախապես պլանավորել այդ ամենը: Կառավարության 3 օղակներն են աշխատել, չէ՞ ՊԵԿ-ը, ոստիկանությունը և սոցապ նախարարությունը »,-հայտնեց բնակիչներից մեկը: Նա հավելեց, որ իրենք շարունակելու են բողոքի ակցիաները ու չեն համաձայնվելու որևէ ժամանակավոր լուծման հետ , նրանք ակնկալում են, որ հետ կվերադառնան իրենց բնակարաններ:
«Ինձ Չարբախի հանրակացարաններից մեկի տան բանալի են տվել, 5 երեխու հետ գնացի՝ խազեինը տան մեջ նստած էր, էդ մարդն էդ տան սեփականատերն էր, նորից բանալիները բերել հետ եմ տվել ոստիկանությանը: Հիմա ես եղբորս տանն եմ ապրում».-ասաց ներկաներից մեկը:
Կարդացեք նաև
Կառավարությունում հանդիպումից տպավորություն էին ստացել , թե փորձել են ճշտել իրենց «քաղաքական ճաշակը»: Բնակիչները պնդում էին, որ գնալով իրենց բողոքի ալիքը մեծանալու է:
Հիշեցնենք, որ 10 օրից ավելի՝ ՊՆ նախկին վարչական շենքի բնակիչները դրսում են մնացել, անօթևան մնացած այդ մարդկանց շարքերում կան ծերեր, երեխաներ, կերակրող մայրեր, պատերազմի հետեւանքով հայրենազրկվածներ, մարտական հերթապահություն իրականացնողների ընտանիքներ։
Լուսինե ՄԱՐԳԱՐՅԱՆ
