ՀՀ հակակոռուպցիոն դատարանում, դատավոր Վահե Դոլմազյանի նախագահությամբ, երեկ կայացավ դատավոր Արուսյակ Ալեքսանյանի, նրա օգնական Թամարա Պետրոսյանի եւ փաստաբան Էրիկ Ալեքսանյանի գործով հետաձգված դատական նիստը։
Քննարկվեց փաստական տվյալների թույլատրելիության եւ անթույլատրելիության հարցը։ Էրիկ Ալեքսանյանը միջնորդություն ներկայացրեց, ըստ որի՝ իրենք ցանկացել էին, որպեսզի դատարանը ճանաչի անթույլատրելի որպես ապացույց ճանաչվող դեռեւս նախաքննական փուլում օպերատիվ հետախուզական միջոցառումների արդյունքում ձեռք բերված տվյալները, որովհետև, ըստ էության, դեռևս քննության ամենասկզբում այդ օպերատիվ հետախուզական միջոցառումների թույլտվությունները դատարանը տվել է բավարարվելով միայն օպերատիվ զեկուցագրի հիմքով, ինչը բազմաթիվ նախադեպային որոշումների եւ օրենքի հետ տրամաբանությունից ելնելով, չէր կարող այդպես լինել։ Այսինքն, դատարանը նման թույլտվություն կարող էր տալ եւ հետագայում այդ ՕՀՄ ժամկետը երկարացնել միայն այն պարագայում, եթե ներկայացվեին բավարար եւ առարկայական տվյալներ։ Սակայն այդպիսիք չեն եղել։
«Դրանով է պայմանավորված, որ մենք այսօր դատարանին միջնորդեցինք այդ տվյալները որպես ապացույց անթույլատրելի ճանաչելու մասին։ Բացի դրանից, նման միջնորդություն ներկայացրեց նաեւ իմ պաշտպան Միքայել Շխիմյանը, սակայն միջնորդության բովանդակությունը մի փոքր այլ էր։ Պարոն Շխիմյանի միջնորդության հիմքը կայանում էր նրանում, որ այդ տվյալները անթույլատրելի են այնքանով, որքանով ի սկզբանե այդ ՕՀՄ-ները եղել են ոչ իրավաչափ՝ հաշվի առնելով այն հանգամանքը, որ տիկին Ալեքսանյանի անձեռնմխելիությունը հաղթահարված չի եղել։ Իսկ նման գործողություն կատարելու համար կարող էր իրավաչափ իրավիճակ ստեղծվել միայն այն դեպքում, երբ նրա անձեռնմխելիությունը լիներ հաղթահարված։ Նման գործողությունը կատարվում է միայն ԲԴԽ թույլտվությամբ։ Սա ենթադրվում է որպես փաստացի քրեական հետապնդում։
Դատարանը իմ միջնորդության պարագայում որոշում կայացրեց դրա լուծումը հետաձգելու մասին, որովհետեւ անհրաժեշտ է հետազոտել գործում որոշակի փաստական տվյալներ, իսկ սա այն փուլը չէ, որպեսզի դատարանը հետազոտի, նոր միջնորդության վերաբերյալ վերջնական լուծում տա։ Պարոն Շխիմյանի ներկայացրած միջնորդությունը դատարանը մերժեց։
Կարդացեք նաև
Ես կարծում եմ՝ այս որոշումը իրավաչափ չէ, չի բխում օրենքից եւ մեր կողմից վկայակոչված նախադեպային որոշումներից։ Բայց դատավարությունը դեռեւս շարունակվում է եւ հետագա դատավարության մյուս փուլերում եւս բազմաթիվ հարցեր ունենք բարձրացնելու»,-Aravot.am-ին ասաց Էրիկ Ալեքսանյանը։
Աշոտ ՀԱԿՈԲՅԱՆ