Մայիսի 24-ին Երևանում և Ստեփանակերտում ստորագրվել է «Հանուն Արցախի փրկության» համագործակցության հուշագիր «ՀԱՄԱԽՄԲՈՒՄ» շարժման, Արցախի Հանրապետության «Արդարություն» կուսակցության, Հայ Հեղափոխական Դաշնակցության Արցախի կառույցի և Արցախի ժողովրդավարական կուսակցության միջև։
Հուշագրի տեքստում ասվում է․
Հաշվի առնելով Հայաստանի Հանրապետության և Արցախի Հանրապետության առջև ծառացած մարտահրավերներին դիմագրավելու համար մեկտեղված կարողությունների ձևավորման խիստ անհրաժեշտությունը և գիտակցելով խնդիրների լուծման հրատապությունը, մասնավորապես՝
– հաղթահարել Հայաստանի և Արցախի Հանրապետությունների առջև կանգնած գոյութենական մարտահրավերները,
Կարդացեք նաև
– կանխել Հայաստանի և Արցախի Հանրապետությունների վերջնական կապիտուլյացիան և պետականության ոչնչացումը,
– դուրս բերել Հայաստանի և Արցախի Հանրապետությունները ներկայիս անվտանգային ճգնաժամից,
– հավատարիմ լինել Հայաստանի Հանրապետության ինքնիշխանությունն ու Արցախի ինքնորոշումը պաշտպանելու հանձնառությանը,
համաձայնության եկան համատեղ քաղաքական գործունեություն ծավալելու մասին:
Ըստ այդմ՝ «ՀԱՄԱԽՄԲՈՒՄ» շարժումը, ԱՀ «Արդարություն» կուսակցությունը, Հայ Հեղափոխական Դաշնակցության Արցախի կառույցը, Արցախի ժողովրդավարական կուսակցությունը
ա) արձանագրում են, որ Արցախի Հանրապետությունը կայացած պետություն է, և այս փաստն անբեկանելի իրողություն է,
բ) փաստում և արձանագրում են, որ միավորված գործունեությունը հիմնված է լինելու Հայաստանի և Արցախի շահերի գերակայության սկզբունքի վրա և նպատակ ունի ապահովել Հայաստանի և Արցախի երկարատև ու կայուն փոխգործակցությունը,
գ) անհրաժեշտ քաղաքական և այլ նախաձեռնությունների ներդաշնակեցման, կապի ամրապնդման և համատեղ իրականացվելիք գործողություններն ապահովող քայլերը համաձայնեցնելու համար նպատակ ունեն իրականացնել փոխգործակցություն Հայաստանի և Արցախի տարածքում՝ նպաստելով հայկական երկու պետություններում ճգնաժամերը հաղթահարելու համատեղ գործունեության արդյունավետության բարձրացմանը,
դ) համախմբված գործունեության (այդ թվում՝ քաղաքական կամ հասարակական նոր ուժերի ներգրավման) վերաբերյալ որոշումները կկայացնեն փոխադարձ համաձայնությամբ:
Սույն Հուշագիրն ուժի մեջ է մտնում ստորագրման պահից և դրա գործունեությունը կարող է դադարեցվել կողմերի փոխադարձ համաձայնությամբ կամ նրանցից մեկի նախաձեռնությամբ։
Աննա Կոստանյան
«ՀԱՄԱԽՄԲՈՒՄ» ՇԱՐԺՈՒՄ
Հակոբ Հակոբյան
ԱՐՑԱԽԻ «ԱՐԴԱՐՈՒԹՅՈՒՆ» ԿՈՒՍԱԿՑՈՒԹՅՈՒՆ
Արթուր Մոսիյան
ՀԱՅ ՀԵՂԱՓՈԽԱԿԱՆ ԴԱՇՆԱԿՑՈՒԹՅԱՆ ԱՐՑԱԽԻ ԿԱՌՈՒՅՑ
Աշոտ Ղուլյան
ԱՐՑԱԽԻ ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹՅՈՒՆ
