«Հայաստանի սահմանները գծվել են հազարավոր մեր տղաների արյունով: Եվ խոսել կադաստրի թղթի մասին ինձ համար վիրավորական է: Ոչ ոք չի կարող քննարկել մեր պետականության, մեր լինելիության հարցը»,- այսօր «Այլընտրանքային նախագծեր» խմբի «Հայրենի՞ք, թե՞ կադաստրի թղթով ցեղասպանություն» թեմայով քննարկմանն ասաց ԲՀԿ անդամ, նախկին պատգամավոր Իվետա Տոնոյանը:
Նրա խոսքով՝ կարող է Փաշինյանը «Հայկական ժամանակի» տաղանդավոր խմբագիր է եղել, բայց Հայաստանի պատմությունը սեփական ճաշակով խմբագրելու բարոյական իրավունք նրան չեն տվել:
«Հայրենիք» կուսակցության խոսնակ Սոս Հակոբյանն ասաց, որ երբ հարեւանդ «դռելով» մտնում է քո խոհանոց, պիտի անես երկու բան. «Մնում է կա՛մ հարեւանիդ ատամները կոտրել, հետո զանգել ոստիկանություն, կամ զանգել ոստիկանություն եւ պատասխանի բացակայության դեպքում էլի կոտրել ատամները: Մենք ի՞նչ ենք անում՝ փակվում ենք բաղնիքում կամ զուգարանում, տնեցիքին էլ թողնում ենք ինչ-որ արանքներում, միջանցքներում՝ հույս ունենալով, սպասելով, մինչեւ այդ հարեւանը դուրս կգա, կամ կորոշի՝ խոհանոցից հետո հյուրասենյակդ էլ վերցնի, ավելի կլորիկ ու սիրուն տուն ստանա»:
Կարդացեք նաև
«Հայաստան» խմբակցության պատգամավոր Էլինար Վարդանյանը մեջբերեց «Այլընտրանքային նախագծեր» խմբի անդամ Վահե Հովհաննիսյանի խոսքը, որ եթե կայացած պետության համար Փաշինյանն ասում է՝ կադաստրի թուղթ չունի եւ հարցականի տակ է դնում մեր կերտած պատմությունը, ապա վաղը նույն մարդը հանգիստ կարող է ասել՝ չի եղել ցեղասպանություն, կարող է կասկածի տակ դնել 1.5 մլն հայերի սպանությունը՝ ասելով որ չունեն մահվան վկայական, Օսմանյան կայսրության թաղման բյուրոն նրանց չի տվել թաղման վկայական:
Հռիփսիմե ՋԵԲԵՋՅԱՆ
