Այսօր ԱԺ-ում իշխանականների եւ ընդդիմադիր պատգամավորների միջեւ վիճաբանությունից հետո լրագրողները «Պատիվ ունեմ» խմբակցության պատգամավոր Թագուհի Թովմասյանին հարցրեցին՝ ՔՊ պատգամավոր Վիգեն Խաչատրյանի հուղարկավորությանը, հոգեհանգստին չմասնակցեցիք, հուշամատյանում բան չգրեցիք՝ լինելով ԱԺ մարդու իրավունքների պաշտպանության եւ հանրային հարցերի հանձնաժողովի նախագահ, գուցե դա՞ է պատճառը, որ ՔՊ-ականները բորբոքված են՝ նա պատասխանեց. «Հա հետո՞: Դա՞ է մեր երկրի պրոբլեմը: Որ Մարդու իրավունքների հանձնաժողովի նախագահ եմ, բոլորի թաղումներին պիտի մասնակցե՞մ: Ժողովուրդ, դա ի՞նչ հարց է ընդհանրապես»:
Այսօրվա նիստում հիշատակի հարգման գործողությանը նույնպես չէր մասնակցել Թագուհի Թովմասյանը: Նա ասաց, որ նիստին ուշացած է եկել. «Ես սովորաբար գնում եմ հուղարկավորությունների այն մարդկանց, որոնց ճանաչում եմ, մտերիմ եմ, կամ ընտանիքի անդամների հետ ունեմ մտերիմ հարաբերություններ: Ես երբեք Վիգեն Խաչատրյանի հետ չեմ ունեցել մտերիմ հարաբերություններ, երբե՛ք: Դա իմ անձնական որոշումն է՝ մասնակցել, թե չմասնակցել: Ասեմ, ի դեպ, կան ՔՊ-ականներ, որոնց, եթե Աստված մի արասցե, մի բան պատահի, կգնամ անպայման երկու արարողություններին էլ՝ ե՛ւ հուղարկավորությանը, ե՛ւ հոգեհանգստին»:
Հռիփսիմե ՋԵԲԵՋՅԱՆ
