ԵՄ խորհրդի նախագահ Շառլ Միշելի խոսնակը նրա անունից հայտարարություն է տարածել Աղդամ-Ստեփանակերտ ճանապարհով ռուսական մատակարարման վերաբերյալ՝ հույս հայտնելով, որ դա խթան կհանդիսանա կանոնավոր մատակարարումների վերականգնման համար: Հայտարարության մեջ ասվում է.
Համաձայն 2023թ. սեպտեմբերի 1-ի մեր հայտարարության մեջ հրապարակայնորեն ուրվագծված տարրերի և առաջարկների՝ նախագահ Միշելը շարունակել է սերտորեն ներգրավված լինել այդ և այլ մոտեցումների առաջմղմամբ՝ առաջնային ուշադրություն դարձնելով լարվածության թուլացմանը և Ղարաբաղի հայերի առջև ծառացած հումանիտար իրավիճակին։
Մասնավորապես, նախագահ Միշելը վերջին մի քանի օրերին ինտենսիվ շփումներ է ունեցել ինչպես Հայաստանի վարչապետ Նիկոլ Փաշինյանի, այնպես էլ Ադրբեջանի նախագահ Իլհամ Ալիևի հետ 2023թ. սեպտեմբերի 9-ի հեռախոսազրույցների ժամանակ, ինչպես նաև Թուրքիայի նախագահ Ռեջեփ Թայիփ Էրդողանի հետ՝ 2023թ. սեպտեմբերի 10-ին Նյու Դելիում G20-ի գագաթնաժողովի շրջանակում:
Բաքվի, Երևանի և Ղարաբաղի հայերի ներկայացուցիչների հետ նրա գրասենյակի և ԵՄ հատուկ հանձնակատար Տոյվո Կլաարի ամենօրյա փոխգործակցությամբ իրականացվող այս ջանքերն ուղղված են լարվածության թուլացմանը և Ղարաբաղի հայերին հումանիտար ապաշրջափակման համար լուծում մշակելուն:
Կարդացեք նաև
Այս համատեքստում մենք ի գիտություն ենք ընդունում Աղդամ-Ասկերան երթուղով ռուսական մարդասիրական օգնության անցումը: Մենք հասկանում ենք այս զարգացման հետ կապված ողջ զգայունությունը. մեր ակնկալիքն է, որ դա խթան կստեղծի տեղի բնակչությանը մարդասիրական կանոնավոր մատակարարումների վերսկսման համար:
Իրավիճակը տեղում արագորեն վատթարանում է. կարևոր է ապահովել Ղարաբաղի հայերին առաջին անհրաժեշտության ապրանքների մատակարարումը։ Աղդամ-Ասկերան երթուղու բացումն այսօր կարևոր քայլ է, որը պետք է նպաստի նաև Լաչինի միջանցքի վերաբացմանը։ Մենք կոչ ենք անում բոլոր շահագրգիռ կողմերին պատասխանատվություն և ճկունություն ցուցաբերել՝ ապահովելու, որ օգտագործվի ինչպես Լաչինի, այնպես էլ Աղդամ-Ասկերան երթուղին։
Տեղում այս ծանր իրավիճակը չափազանց երկար է տևել. այժմ կարևոր է գտնել կայուն և փոխադարձաբար ընդունելի լուծումներ՝ ապահովելու մարդասիրական հասանելիությունը, նաև աշնան և ձմեռային սեզոններին ընդառաջ:
Մենք վերահաստատում ենք մեր խորը համոզմունքը, որ Լաչինի միջանցքը պետք է ապաշրջափակվի՝ համաձայն նախորդ համաձայնագրերի և ՄՔԴ հրամանի, և ընդգծում ենք մեր հավատքը մատակարարման այլ ուղիների օգտակարության վերաբերյալ՝ ի շահ տեղի բնակչության։
ԵՄ-ն ակնկալում է, որ այսօրվա զարգացումներին կհետևեն ավելի կոնկրետ քայլեր առաջիկա օրերին և շաբաթներին՝ կապված նաև Բաքվի և Ղարաբաղի հայերի միջև նրանց իրավունքների և անվտանգության շուրջ երկխոսության, հաշտեցման ջանքերի և ընդհանուր հայ-ադրբեջանական խաղաղության գործընթացի հետ։
Պատրաստեց Վիկտորյա ԱՆԴՐԵԱՍՅԱՆԸ
