Կարեւորում եմ կայացած ինստիտուցիոնալ ասոցիացիաների հետ աշխատանքը եւ շնորհավորում եմ խորհրդի նոր անդամներին ընտրվելու կապակցությամբ. ասել է ՀՀ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանն Ամերիկայի առեւտրի պալատը Հայաստանում (ԱԱՊՀ) հասարակական կազմակերպության անդամների հետ աշխատանքային քննարկման ընթացքում:
Այն տեղի է ունեցել նոյեմբերի 9-ին, որին մասնակցել են նաեւ Տնտեսական հարցերի մշտական հանձնաժողովի անդամներ Հովիկ Աղազարյանը, Դավիթ Առուշանյանը, Նարեկ Ղահրամանյանը եւ Ծովինար Վարդանյանը:
Կազմակերպության խորհրդի անդամ Տիգրան Ջրբաշյանը, տեղեկացնելով, որ Հայաստանում գրանցված է շուրջ 374 բիզնես ասոցիացիա, նշել է, որ ԱԱՊՀ-ն անդամավճարների հիման վրա ստեղծված կառույց է:
Նա ընդգծել է, որ Հայաստանում գործող նմանատիպ բիզնես ասոցիացիաները շատ քիչ են: ԱԱՊՀ-ն Հայաստանում գործող անկախ բիզնես ասոցիացիա է եւ ներկայացնում է 175 անդամ ընկերությունների շահերը: Ավելի նպաստավոր գործարար միջավայր ստեղծելու եւ լավագույն գործարար փորձը խթանելու համար ԱԱՊՀ-ն համագործակցում է ՀՀ-ում ԱՄՆ դեսպանատան եւ ՀՀ կառավարության, միջազգային կազմակերպությունների եւ գործարար համայնքի հետ: ԱԱՊՀ-ն ԱՄՆ Առեւտրի պալատի եւ Եվրոպայում Ամերիկյան պալատների անդամ է:
Կարդացեք նաև
Քննարկման օրակարգում ընդգրկված էին մի շարք թեմաներ: Մասնավորապես, պետություն-մասնավոր գործարար երկխոսության դերը, մրցակցային առողջ միջավայրի ապահովումը, աշխատուժի զարգացմանն ուղղված միջոցառումները եւ Հարկային օրենսդրության բարեփոխումները:
Բաբկեն Թունյանը ներկայացրել է ընդհանուր մոտեցումներն օրակարգի հարցերի վերաբերյալ: Խոսելով պետություն-մասնավոր երկխոսության դերի մասին: նա նշել է, որ կան տարբեր հարթակներ, որոնք միշտ չէ, որ արդյունավետ են երկխոսությունն ապահովելու համար: Անդրադառնալով մրցակցային առողջ միջավայրի եւ Հարկային օրենսդրության բարեփոխումներին վերաբերող հարցերին` Բաբկեն Թունյանը կարեւորել է կանխատեսելիության ապահովումը` շեշտելով, որ օրենսդրությունը նախատեսում է որոշ զսպման մեխանիզմներ, շուկան պաշտպանելու համար: Խոսելով աշխատուժի մասին` նա ընդգծել է գործընթացների պարզեցումը` միտված անհարկի բյուրոկրատիայի վերացմանը: Նա առաջարկել է կազմակերպության հետ ձեւավորված հարթակը դիտարկել կամուրջ` առաջացած հարցերին համատեղ լուծում տալու համար:
Դավիթ Առուշանյանը կարեւորել է նման կառույցի գործունեությունը` նշելով, որ Հայաստանի առջեւ ծառացած բազմաթիվ մարտահրավերների պայմաններում կկարողանան օգնել գործարարներին նվազեցնելու ռիսկերը: Այս համատեքստում կարեւորվել է տնտեսավարողների իրազեկման խնդիրը: Պետություն-մասնավոր երկխոսության հարցում նշվել է, որ երկխոսության ձեւաչափն ու գործիքակազմը պետք է համարժեք լինի: Կարեւորվել է ինստիտուցիոնալ համակարգի ձեւավորման անհրաժեշտությունը:
Քննարկվող հարցերի վերաբերյալ կազմակերպության անդամները ներկայացրել են իրենց դիտարկումներն ու առաջարկությունները: Հրատապ լուծում պահանջող հարցերի վերաբերյալ քննարկումներ ծավալելու եւ պարբերաբար հանդիպումներ կազմակերպելու պայմանավորվածություն է ձեռք բերվել:
ՀՀ Ազգային ժողով
