«Իշխանափոխության պահանջով ձեւավորված «Զանգ» շարժումը երրորդ օրն է՝ հանրային իրազեկում է իրականացնում Երեւանի կենտրոնական փողոցներում։ Նրանց ակցիաները չեն անցնում առանց ոստիկանության հետ խնդիրների։ Մասնավորապես, երեկ բերման էր ենթարկվել շարժման ութ մասնակից, իսկ այսօր քայլերթի սկզբում արդեն երեք ակտիվիստի ոստիկանության մեքենայով տեղափոխեցին բաժանմունք։
Ադրբեջանագետ Տաթեւ Հայրապետյանը, որ միացել է շարժմանը, Aravot.am-ին ասաց․ «Նախաձեռնողները՝ Միքայել Նահապետյանը եւ Սուրեն Սահակյանը, այս շարժումը սկսել են նպատակ ունենալով փոխել իշխանությունը, քանի որ նա ունակ չէ դիմակայել երկրի առջեւ ծառացած մարտահրավերներին։ Ադրբեջանը արդեն մոտ մեկ տարի ակտիվորեն աշխատում է արեւմտյան Ադրբեջան կոնցեպտի շուրջ,նամակներ է հղում ՄԱԿ եւ այդ միջոցով հիմք է ստեղծում լայնամասշտաբ ագրեսիայի համար։ Իսկ Հայաստանի իշխանությունը կանգնում ու հայտարարում է, թե մենք պետք է հրաժարվենք Անկախության Հռչակագրից, Արցախից, Արարատ լեռից, վերջերս էլ հայկական մետաղադրամների վրա Հայոց Զինանշանից, մեր ինքնությունից, մեր արմատից եւ դրանից հետո խաղաղ կլինի։
Այսինքն, այն ամենից ինչը մեր պետությունը յուրահատուկ է դարձնում։ Իսկ դա ոչ միայն խաղաղություն չի բերում, այլեւ մեզ կանգնեցնում է նոր ագրեսիայի առաջ։ Ու քանի որ ինքս տեղյակ եմ, հետեւում եմ, տեղյակ եմ Ադրբեջանի քաղաքականությանը, աջակցում եմ այս շարժմանը, քանի որ հասկանում եմ ռեալ վտանգները, որ կարող է երկու-երեք ամսից կանգնենք շատ լուրջ խնդիրների առաջ, եթե Ադրբեջանը գնա նոր ագրեսիայի Հայաստանը Վրաստանին եւ Իրանին կապող ուղիների ուղղությամբ։ Մեր նկատմամբ կարող է բեմադրվել նույն սցենարը, ինչ տեղի ունեցավ Արցախում։ Ուղղակի մենք գնալու տեղ այլեւս չունենք։ Հետեւաբար, մենք պետք է կարողանանք այդ ժամանակը օգտագործել, իշխանությունը փոխել, ձեւավորել նորմալ, պրոֆեսիոնալ պետականամետ կառավարություն, որն այս երկրի շահերը կսպասարկի եւ կկարողանա դուրս բերել այս ծանր վիճակից։
Կարդացեք նաև
Վիճակն իրոք բարդ է, բայց անելանելի չէ։ Եվ այն հեքիաթները, որ պատմում են, թե լուծում չկա, մենք դաշնակից չունենք, մեզ ոչ-ոք չի սիրում, դա ընդամենը իրենց անկարողության հետ կապված միֆերն են, միջոց են։ Այսինքն, իրենք այդ տեղեկատվական գրոհն անում են ու մարդիկ ասում են, դե լավ, երեւի ելք չկա, այս մարդն ինչ անի։ Ու հետո մենք բախվում ենք հաջորդ հարվածի, հաջորդ պատերազմի ռիսկի, հաջորդ կորուստների հետ։ Ու այսպես դա որեւէ կետում դադար չի առնում։
Թեկուզ եղանակային պայմանները բարենպաստ չեն, ժամանակահատվածն այդպիսին չէ, բայց ես կարծում եմ՝ ավելի լավ է մենք մեզ անհարմարություններ պատճառելով այսօր փողոց դուրս գանք, քան երկու ամսից առհասարակ տեսնենք, որ բլոկադայի մեջ ենք, բարդ իրավիճակում ենք, պատերազմի սպառնալիքի տակ ենք եւ ոչինչ անել չենք կարող»։
Մեր հարցին, թե այդ երկու-երեք ամիսը ի՞նչ հաշվարկով է ի հայտ եկել, Տաթեւ Հայրապետյանը պատասխանեց․ «Եղանակային պայմանների առումով Ալիեւը կսպասի։ Նա դեռ պետք է մարսի Արցախում տեղի ունեցած էթնիկ զտումը։ Առաջիկայում տոնական շրջանն է սկսվում, իսկ դրանից հետո քաղաքական իրավիճակը բարդանալու է․ Ռուսաստանում ընտրություններ, ԱՄՆ-ում ընտրություններ։ Ինքն օգտագործելու է այդ վակուումը եւ անցնելու է գործողությունների»։
Աշոտ ՀԱԿՈԲՅԱՆ
