Միջազգային հանրապետական ինստիտուտի (ՄՀԻ)՝ Հայաստանի բնակչության շրջանում հանրային կարծիքի ուսումնասիրության տվյալներով՝ ՀՀ բնակչության 60%-ը չի վստահում ոչ մի քաղաքական կամ հասարակական գործչի։ Նրանց 17 %-ն է վստահում Նիկոլ Փաշինյանին, 5%-ը՝ Արարատ Միրզոյանին, 4%-ը Արամ Զ․ Սարգսյանին, 3%-ը Ալեն Սիմոնյանին և 2%-ը Ռոբերտ Քոչարյանին։
Հարցին՝ ո՞ր կուսակցությանը կամ դաշինքին կտայիք Ձեր ձայնը, եթե խորհրդարանական ընտրություններն անցկացվեին հաջորդ կիրակի, հարցման մասնակիցների 17%-ը պատասխանել է ՔՊ-ին, 3%-ը՝ Նիկոլ Փաշինյանի կուսակցությանը, իշխող կուսակցությանը, 3%-ը՝ «Հայաստան» դաշինքին, 2%-ը ՀՀԿ-ին, 2%-ական տոկոսը «Հանրային ձայն»-ին և ԲՀԿ-ին։
Հարցվածների 48%-ը կցանկանար տեսնել նոր քաղաքական ուժերի, 47%-ին բավարարում են առկա կուսակցությունները։
Հարցվածներն ամենաշատը գոհ են ՀՀ Զինված ուժերի աշխատանքից։ Նրանց 30 %-ը լիովին գոհ է ՀՀ ԶՈՒ աշխատանքից, ամենաքիչը գոհ են ՀՀ ԱԺ-ի աշխատանքից․ լիովին գոհ է 7%-ը։ ՀՀ վարչապետի աշխատակազմից ընդհանրապես գոհ չէ 31%-ը, լիովին գոհ է 19%-ը։ ՀՀ ոստիկանությունից ընդհանրապես գոհ չէ հարցվածների 19%-ը, լիովին գոհ է 23%-ը։ 2019-ի հոկտեմբերի դրությամբ ՀՀ Զինված ուժերի աշխատանքից գոհ է եղել 91%-ը, 2023-ի դեկտեմբերին՝ 64%-ը։ 2019-ի հոկտեմբերի դրությամբ ՀՀ վարչապետի աշխատակազմի աշխատանքից գոհ է եղել հարցվածների 76%-ը, 2023-ի դեկտեմբերի դրությամբ՝ 50%-ը։
Կարդացեք նաև
Դատարանների աշխատանքի վերաբերյալ հանրային կարծիքը գրեթե չի փոխվել։ 2019-ի հոկտեմբերի դրությամբ հարցվածների 36%-ը գոհ է եղել դատարանների աշխատանքից, 2023-ի դեկտեմբերի դրությամբ՝ 37%-ը։
Հանրային կարծիքի ուսումնասիրության տվյաները ցույց են տալիս, որ խոսքի ազատության բնագավառում հանրությունը հետընթաց է նկատում։ 2019-ի հոկտեմբերին հարցվածների 4%-ն էր կարծում, որ խոսքի ազատությունը հետընթաց է ապրել, իսկ 2023-ի դեկտեմբերին՝ 19%-ը։ 2019-ի հոկտեմբերին հարցվածների 80%-ը կարծում էր, որ խոսքի ազատության ոլորտում բարելավում կա, իսկ 2023-ի դեկտեմբերին՝ 54%-ն է այդ կարծիքին եղել։
Հարցվածների 45 %-ը կարծում է, որ ՀՀ արտաքին քաղաքականությունը վերջին վեց ամիսների ընթացքում բարելավվել է, 40%-ը կարծում է, որ ժողովրդավարությունը ևս բարելավվել է, իսկ 42 %-ը կարծում է, որ կրթությունը վերջին վեց ամիսների ընթացքում հետընթաց է ապրել։
Հարցին՝ ո՞րն է կառավարության ամենամեծ ձախողումը վերջին 6 ամիսների ընթացքում, հարցվածների 36%-ը պատասխանել է Արցախի հանձնումը, 11%-ը սխալ արտաքին քաղաքականությունը, դիվանագիտությունը, 6%-ը՝ ՌԴ-ի, ՀԱՊԿ-ի հետ հարաբերություններում լարվածությունը, 6%-ը ամենամեծ ձախողումը համարում է կառավարության սխալ կադրային քաղաքականությունը։
Հարցումն իրականացվել է 2023-ի դեկտեմբերի 13-22-ն ընկած ժամանակահատվածում՝ հեռախոսով անցկացված հարցազրույցների միջոցով ՀՀ ամբողջ տարածքում: Ընտրանքը բաղկացած է եղել 18 տարին լրացած Հայաստանի 1508 մշտական բնակիչներից։ Սխալի սահմանը չի գերազանցում 2,5 տոկոսային կետը ամբողջական ընտրանքի համար:
Տաթև ՀԱՐՈՒԹՅՈՒՆՅԱՆ
