-Իրենց «պագոնները» հանկարծ կընկնեին, եթե իջնեին էստեղ մեր հարցերին պատասխանեին,- լրագրողների հետ զրույցում այսօր Կենտրոնական բանկի (ԿԲ) դիմաց բողոքի ցույցի ժամանակ դժգոհեց ֆինանսական զեղծարարություններից տուժած քաղաքացիների շահերի պաշտպանությամբ զբաղվող Մհեր Կարագյոզյանը:
Ապրիլի 30-ին տուժած քաղաքացիները կրկին Կենտրոնական բանկի դիմաց ցույցի էին դուրս եկել, այդ օրը նույնպես ոչ մեկը Կենտրոնական բանկից նրանց չլսեց, հուսադրող ոչինչ չասաց:
-Մեր տված հարկերի շնորհիվ են ապրում, աշխատում, մեկը բա չլինի՞ դուրս գա՝ ասի՝ ինչ է լինելու մեզ հետ,- դժգոհեց տուժած մի կին, որից զեղծարարները հափշտակել էին 9 միլիոն դրամի խնայողությունը, հետո նրա անունով վարկ ձեւակերպել՝գցելով պարտքերի տակ:
-Պատկան մարմինների լռությունը ոչ օրինաչափ է, դե քաղաքացիներին թալանում են, ոչինչ, թող գնան դատարաններ: Բա չիջնեի՞ն, ասեին՝ ինչ են արել այն բանկի հետ, որտեղ ամենից շատն են տեղի ունեցել զեղծարարությունները, գրավոր պատասխան էլ չեմ ստացել,- շարունակեց Մհեր Կարագյոզյանը:
Կարդացեք նաև
Ըստ նրա՝ մի քանի տուժած քաղաքացի ԿԲ-ից գրավոր պատասխան են ստացել, բոլորի ստացած պատասխանները նույնն են ՝ copy, paste է: Ըստ Կարագյոզյանի՝ ոչինչ չասող պատասխաններ. «Այս լռությունը սովորական անտարբերություն չէ, հերթական անգործությունն է… ՀՀ-ում տեղի է ունեցել թալան, զանգվածային հանցագործություններ»:
Ցուցարարները նախ փակեցին ԿԲ շենքի մուտքը, ոստիկանները հորդորեցին բացել, չխոչընդոտել աշխատակիցների ազատ տեղաշարժի իրավունքը:
Ցուցարարները սկզբում մի քիչ ընդդիմացան, ապա որոշեցին բացել ու երթով գնալ մարդու իրավունքների պաշտպանի գրասենյակ՝ հասկանալու՝ պաշտպանն ինչու է լռում:
-Հարցերը եթե չլուծեն, գնալու ենք բանկերը փակենք, ՀՀ քաղաքացին չի թա-լան-վե-լու, մտքներիցդ հանեք,- հավելեց Մհեր Կարագյոզյանը:
ԿԲ-ից այսօր էլ ցուցարարներին լսելու կամ նրանց հարցերին պատասխանելու համար ոչ մի ներկայացուցիչ դուրս չեկավ:
Արփինե ՍԻՄՈՆՅԱՆ
