Քաղաքացիական օրենսգրքում առաջարկվում է ներդնել երկու նոր ինստիտուտ՝ հետադարձ հիփոթեքը՝ որպես գրավի նոր տեսակ եւ հետադարձ հիփոթեքի վարկային պայմանագիրը: Նախագծով առաջարկվում է նաեւ ներդնել իրավունքի նոր տեսակ՝ «ամուսնու բացառիկ սեփականության իրավունք», որը նախատեսում է, որ ամուսնության ընթացքում ձեռք բերված գույքը կարող է ամրագրվել նաեւ որպես ամուսնու բացառիկ սեփականություն. այս մասին ասել է ՀՀ կադաստրի կոմիտեի ղեկավարի տեղակալ Նանե Ղազարյանը: Ֆինանսավարկային եւ բյուջետային հարցերի մշտական հանձնաժողովի մայիսի 18-ի նիստում առաջին ընթերցմամբ քննարկվել է «Հայաստանի Հանրապետության քաղաքացիական օրենսգրքում փոփոխություններ եւ լրացումներ կատարելու մասին» եւ կից ներկայացված օրենքների նախագծերի փաթեթը:
Կարգավորումը կապահովի կենսապայմանների շարունակականությունը՝ նպաստելով արժանապատիվ ծերությանը: Ամուսնության ընթացքում գույքի գրանցումը, որպես ամուսնու բացառիկ սեփականություն, նաեւ ապահովում է իրավական հստակություն եւ գույքային հարաբերությունների կանխատեսելի զարգացում՝ ամրապնդելով ամուսնու սոցիալական պաշտպանվածությունը: Այսպիսով՝ ընդլայնվում են քաղաքացու՝ սեփական գույքը տնօրինելու իրավասությունները՝ թույլ տալով կենսաթոշակային տարիքի հասնելուց հետո պահպանել այդ գույքը, բայց միեւնույն ժամանակ այն վերածել կապիտալի եւ ստանալ կայուն եկամուտ:
Նախագծի ընդունման արդյունքում կաճի անշարժ գույքի շուկայի մեջ ներգրավված կապիտալի շրջանառությունը, ինչի շնորհիվ շուկան կդառնա ավելի ակտիվ եւ կանխատեսելի: Անշարժ գույքի այն հատվածը, որը մինչեւ հիմա գտնվել է պասիվ սպառողական օգտագործման դաշտում, կդառնա շրջանառվող ֆինանսական ակտիվ՝ ապահովելով նոր դրամական հոսքեր եւ եկամտաբերություն: Անշարժ գույքի շուկան կդառնա ավելի բազմաշերտ՝ կձեւավորվեն շուկայի նոր մասնակիցներ: Նշվել է, որ հետադարձ հիփոթեքի եւ ամուսնու բացառիկ սեփականության իրավունքի ինստիտուտների ներդրումը ոչ միայն անշարժ գույքի զարգացման, այլեւ սոցիալական պետության համար կարեւոր քայլ է: Այն միաժամանակ ապահովում է սեփականության իրավունքի լիարժեք իրացումը, ֆինանսական գործիքների ընդլայնումը եւ քաղաքացիների համար ստեղծում է նոր հնարավորություն՝ իրենց գույքի արժեքը վերածելու կայուն եկամտի:
Նանե Ղազարյանը պատասխանել է պատգամավորների հարցերին՝ ներկայացնելով պարզաբանումներ առաջարկվող փոփոխությունների, կարգավորումների եւ սահմանումների վերաբերյալ:
Կարդացեք նաև
Օրենսդրական փաթեթը ստացել է դրական եզրակացություն:
ԱԺ
