«Ընտրություններին մասնակցող հինգ քաղաքական ուժի կողմից 7 դիմում-բողոք ենք ստացել»,-ԿԸՀ-ում հրավիրված մամուլի ասուլիսի ժամանակ տեղեկացրեց ՀՌՀ մոնիթորինգի և վերահսկողության վարչության պետ Լիաննա Դոխիկյանը։
Նա հայտնեց, որ «Լուսավոր Հայաստան և «Նոր ուժ» կուսակցությունների դիմում-բողոքները վերաբերվում են «Արմենիա թիվի», «Ա-Թիվի», «Ֆասթ սպորտ» ՍՊԸ-ի կողմից նախընտրական ժամանակահատվածում կուսակցությունների իրավունքի իրացմանը խոչընդոտելուն, «Հայաստան» դաշինքի երկու դիմումներից մեկը վերաբերել է Շանթ, «Արմենիա» և Հանրային հեռարձակողների կողմից քաղաքական գովազդի հեռարձակման ենթադրյալ ապօրինի մերժմանը։ «Ուժեղ Հայաստանի» դիմումը վերաբերում է ՔՊ-ի քաղաքական գովազդին, որը ըստ դիմումատուի՝ պարունակել է «Ուժեղ Հայաստանի» իրավունքների խախտման հատկանիշներ։
Լիանա Դոխիկյանը հավելեց․ «ՀԱԿ-ի դիմում-բողոքները վերահասցեագրվել են մեզ ԿԸՀ-ի կողմից։ Դրանցից մեկը վերաբերում է հանրային հեռարձակողի յուբության հարթակում տեղադրված նյութին, իսկ մյուսը Հանրային հեռարձակողի կողմից կազմակերպված երկրորդ բանավեճի ժամանակ հավասարության խախտման հատկանիշներին։ «Լուսավոր Հայաստանի» և «Նոր ուժի» դիմում-բողոքների հիման վրա հարուցվել են վարչական վարույթներ»։
Լիանա Դոխիկյանը հայտնեց՝ ընտրություններին վերաբերող յոթ վարչական վարույթ է հարուցվել․ «Շանթ» և «Գործարար ալիքի» ծրագրերի մասով վարչական վարույթները հարուցվել են նախընտրական քարոզչությանը վերաբերող տեսալսողական հաղորդումներն առերևույթ առևտրային գովազդով ընդմիջելու արգելքի խախտման հատկանիշներով։ «Ֆասթ սպորտ», «Արմենիա թիվի» և «Ա-Թիվի ծրագրերի մասով վարչական վարույթները հարուցվել են նախընտրական քարոզչության ժամանակ անվճար 25-ական րոպեներից օգտվելու՝ կուսակցությունների իրավունքի իրացման հատկանիշներով։ 5-րդ ալիքի մասով վարչական վարույթը հարուցվել է հեռարձակվող քաղաքական գովազդի պատճառով, որը պարունակել է ազգային և համաշխարհային մշակութային ժառանգությունը վարկաբեկող տարրեր։ Լռության օրվա հետ կապված խախտում այս պահին արձանագրված չէ»։
Կարդացեք նաև
Տաթև ՀԱՐՈՒԹՅՈՒՆՅԱՆ
