Հինգշաբթի, 9 Յուլիս 2026-ին, հանդիսապետութեամբ ԱՄՆ Արեւմտեան Թեմի Առաջնորդ Բարձրաշնորհ Տէր Յովնան Արք. Տէրտէրեանի, տեղի ունեցաւ Կլէնտըլի հայկական նոր եկեղեցւոյ տասնվեց հիմնաքարերու օծման հոգեպարար արարողութիւնը։ Արարողութեան ներկայ էին Կլէնտըլի Հայ Համայնքի նոր համալիրի եւ եկեղեցւոյ հոգեւոր հովիւ Արժանապատիւ Տէր Մանուկ Աւագ Քահանայ Մարգարեանը, Epostle-ի Հոգեւոր Պատասխանատու Արժանապատիւ Տէր Վազգէն Աւագ Քահանայ Մովսէսեանը, տասնվեց հիմնաքարերու կնքահայրերը, Ծխական Խորհուրդի անդամները, շինարարական յանձնախումբի անդամները եւ բազմաթիւ հաւատացեալներ։
Եկեղեցական շարականներու, սուրբգրային ընթերցումներու եւ աղօթքներու ուղեկցութեամբ Սրբազան Հայրը կատարեց նորակառոյց եկեղեցւոյ տասնվեց հիմնաքարերու օծումը, որուն մասնակցեցան նաեւ տասնվեց կնքահայրերը։ Հոգեւոր մթնոլորտի մէջ կատարուած այս արարողութիւնը դարձաւ Կլէնտըլի հայկական նոր համալիրի եւ, մանաւանդ, եկեղեցաշինական աշխատանքներուն կարեւորագոյն հանգրուաններէն մէկը՝ խորհրդանշելով նոր սրբավայրի կառուցման յառաջընթացը եւ համայնքի միասնական նուիրումը։
Իր քարոզին առանցքը դարձնելով Սաղմոսերգուի խօսքը՝ «Քու Խօսքդ ճրագ է իմ ոտքերուս եւ լոյս՝ իմ ճանապարհիս» (Սաղմոս 118 [119]։105), Սրբազան Հայրը ընդգծեց, որ Աստուծոյ Խօսքը այն անշէջ լոյսն է, որ կը լուսաւորէ անհատի, համայնքի եւ ամբողջ Եկեղեցւոյ ճանապարհորդութիւնը։ Սրբազան Հօր բնորոշումով 16 հիմնաքարերը կենդանի վկայութիւն են այն հաւատքին, որուն վրայ կը կերտուի Կլէնտըլահայութեան հաւատքը՝ ծառայելու Աստուծոյ փառքին եւ հայ ժողովուրդի հոգեւոր կեանքի աճման։
Սրբազան Հայրը յիշեցուց, որ իւրաքանչիւր օծուած հիմնաքար իր մէջ կը կրէ աղօթք, նուիրում եւ յոյս, իսկ եկեղեցին պիտի դառնայ այն սրբազան տունը, ուր սերունդներ պիտի մկրտուին, ուր Սուրբ եւ Անմահ Պատարագներ պիտի մատուցուին, Աստուծոյ Խօսքը քարոզուի, եւ համայնքը պիտի շարունակէ իր հոգեւոր ու ազգային կեանքի վերելքը։
Կարդացեք նաև
Սրբազան Հայրը իր խոր գնահատանքը յայտնեց Կլէնտըլի Հայ Համայնքի նոր համալիրի եւ եկեղեցւոյ հոգեւոր հովիւ Արժանապատիւ Տէր Մանուկ Աւագ Քահանայ Մարգարեանին, որ հետեւողական նուիրումով եւ հովուական հոգածութեամբ կը ծառայէ այս պատմական ծրագրի իրականացման։ Ան շնորհակալութիւն յայտնեց նաեւ տասնվեց հիմնաքարերու կնքահայրերուն՝ անոնց հաւատքին, առատաձեռնութեան եւ եկեղեցասիրութեան համար։
Սրբազան Հայրը գնահատեց նաեւ Ծխական Խորհուրդի անդամները, շինարարական յանձնախումբը, նուիրատուները, ճարտարապետները եւ բոլոր աջակիցները, որոնց հաւաքական աշխատանքն ու զոհողութիւնը օր ըստ օրէ իրականութիւն կը դարձնեն համայնքի այս պատմական երազանքը։
Տասնվեց հիմնաքարերու օծումը դարձաւ Կլէնտըլի հայկական նոր եկեղեցւոյ կառուցման ճանապարհին պատմական բարձրակէտը։ Նոր եկեղեցւոյ օծման թուականին եւ յարակից հանդիսութիւններուն մասին Առաջնորդարանը ապագային առանձին ծանուցումով պիտի տեղեկացնէ մեր ժողովուրդի զաւակներուն։
Կլէնտըլի հայկական նոր համալիրն ու նոր եկեղեցին վառ վկայութիւնն են Բարձրաշնորհ Տէր Յովնան Արք. Տէրտէրեանի երկարամեայ, եկեղեցաշէն, համայնակերտ եւ հեռատես առաջնորդութեան։ Անոր հայրական առաջնորդութեամբ Արեւմտեան Թեմը վերջին տարիներուն ապրեցաւ հոգեւոր, կրթական, մշակութային եւ շինարարական նշանակալի վերելք մը։ ԱՄՆ Արեւմտեան Թեմի հիմնադրութեան 100-ամեակի նշման սեմին կանգնած նոր եկեղեցին պիտի մնայ այդ տեսլականին մնայուն խորհրդանիշը՝ ծառայելով որպէս հաւատքի, ազգային ինքնութեան եւ Հայաստանեայց Առաքելական Սուրբ Եկեղեցւոյ յաւերժական ներկայութեան կենդանի վկայութիւնը Ամերիկայի Արեւմտեան հայահոծ համայնքներէն եւ ծուխերէն ներս, սերունդէ սերունդ պահպանելով մեր ժողովուրդի հաւատքը, ազգային ինքնութիւնը եւ եկեղեցական ժառանգութիւնը՝ ի փառս Աստուծոյ եւ ի բարօրութիւն ամբողջ հայ ազգին։
ԴԻՒԱՆ ԱՌԱՋՆՈՐԴԱՐԱՆԻ
Յուլիս 10, 202
