Գյումրու քաղաքապետի առաջին տեղակալ, քաղաքապետի պաշտոնակատար Ավետիս Առաքելյանն այսօր լրագրողների հետ զրույցում տեղեկացրեց՝ կփորձեն շատ արագ կառուցել շների կացարանը։
Հիշեցնենք, որ այս նպատակի համար կառավարությունը գումար էր հատկացրել, սակայն Ավետիս Առաքելյանը բազմիցս բողոքել էր, թե 124 միլիոնանոց ծրագիրն իրագործելու նպատակով 5-րդ անգամ մրցույթ է հայտարարվում, սակայն շինարարական ոչ մի ընկերություն չի մասնակցում։ Քաղաքապետարանը ստիպված էր գումարը հետ ուղարկել։
Գյումրու քաղաքային իշխանությունը կասկածներ ուներ, որ կառավարությունն է խոչընդոտում՝ շինարարները գան, մասնակցեն մրցույթի։
Կարդացեք նաև
Այսօր Ավետիս Առաքելյանը մանրամասնեց, որ շների կացարանի վայրը որոշված է, էսքիզային տարբերակը կա, շուտով նախագիծը կլինի ու մրցույթ կհայտարարեն, թեև, ըստ նրա, հնարավոր է առանց մրցույթի էլ կառուցեն՝ դոնոր կազմակերպության օժանդակությամբ։
Իսկ թե ով է դոնորը, Ավետիս Առաքելյանը տեղեկացրեց, որ խոսքը Սամվել Կարապետյանի մասին է։
Նա պատրաստակամություն է հայտնել վերակառուցել նաև Գյումրու Գործարանային հանրակացարաններից մեկի փլուզվող շենքը, որտեղ կյանքը, այնտեղ ապրողների բնութագրմամբ՝ երկրագնդից դուրս է։
Ավետիս Առաքելյանը սակայն ժպտալով ասում է․ «Սամվել Կարապետյանը կանի, եթե նոր օրենքներ չընդունեն, չսահմանափակեն, թեև նա բարեգործական հիմնադրամ ունի, որը նոր չի ստեղծվել։ Քաղաքի բնակչության շահերից ելնելով՝ լավ կլինի նոր օրենքներ չընդունեն ու թույլ տան, նա պատրաստ է ամբողջն անելու»։
Նունե ԱՐԵՎՇԱՏՅԱՆ
